यातायातमन्त्री भन्छन्, 'बीपी राजमार्ग दसैँअगाडि पूर्णरुपमा सञ्चालन हुँदैन'

काठमाडाैँ । भौतिक पूर्वाधार तथा यातायात मन्त्रालयले बीपी राजमार्ग दसैँअगाडि पूर्णरुपमा सञ्चालन हुन नसक्ने जनाएको छ । 

बिहीबार सिंहदरबारमा पत्रकार सम्मेलन गर्दै मन्त्रालयले बीपी राजमार्गको चौकी डाँडादेखि कालढुंगा खण्डमा बाढीका कारण सडक नै बगाएकाले दसैँ अगाडि पूर्णरुपमा सञ्चालन हुन नसक्ने जनाएको हो । त्यसको बिकल्पका रुपमा अन्य रुटहरुलाई सहज ढंगले सूचारु गर्ने काम भइरहेको मन्त्रालयका सचिव केशवकुमार शर्माले जानकारी दिए ।

सो सडक–खण्डमा पहाड काटेर सडक बनाउने अवस्था नरहेको र सडक बनाउनका लागि पर्खाल नै उठाउनुपर्ने देखिएको उनले बताए । उनले बाढीका कारण बीच बाटोमा फसेका सवारीसाधानलाई निकाल्नका लागि खोला किनारमा नै अस्थायी सडक निर्माणको काम भइरहेको जानकारी दिए । दशैँअघि उपत्यका बाहिरिने अन्य राजमार्गहरु सूचारु हुने उनले भनाइ छ । शर्माले बाढीका कारण ८ स्थानका पुलमा क्षति भएको र सम्भव भएका स्थानमा बेलिब्रिज राख्ने तयारी भइरहेको जिकिर गरे । 

त्यस्तै भौतिक पूर्वाधार तथा यातायात मन्त्री देवेन्द्र दाहालले बाढीका कारण बीपी राजमार्ग अहिलेको जस्तो क्षति हुने कल्पना पनि नगरिएको बताए । उनले बाढीका कारण अवरुद्ध सडक सूचारु गर्न तीव्र रुपमा काम भइरहेको जानकारी दिए । मन्त्री दाहालले विपदका बेला भाडादरमा हुने ठगि रोक्न निरन्तर अनुगमन हुने धारणा राखे ।

बर्षाका कारण आएको बाढीले ३४ वटा राजमार्गहरुका ८ सय ५ स्थानमा पहिरो गइ सडक अवरुद्ध भएकोमा ७ सय ७४ स्थानको पहिरो हटाई २९ वटा राजमार्गमा यातायात सुचारु गरिएको मन्त्रालयले जनाएको छ । अझैपनि ५ वटा मुख्य राजमार्गका ३१ स्थानमा सडक अवरुद्ध भएको मन्त्रालयले जनाएको छ । जसअनुसार अरनिको राजमार्गको लार्चा–कोदारी खण्ड,  बिपि राजमार्गको चौकीडाँडा–कालढुङ्गा खण्ड, पुष्पलाल मध्यपहाडी मार्गको दोलालघाट–राकथुमखण्ड, कान्ती राजपथको घपेली–बगुवाखण्ड र मेचि राजमार्गको रमिते–फिदिमखण्ड अवरुद्ध छन् । बाढीले बगाएका सडक सूचारु गर्नका लागि अस्थायी संरचना बनाउन मात्र करिव ३ अर्व लाग्ने अनुमान मन्त्रालयले गरेको छ ।