सहकारी प्रकरणमा रवि लामिछाने दोषी छैनन्ः प्रचण्ड

काठमाडौँ । नेकपा माओवादी केन्द्रका अध्यक्ष पुष्पकमल दाहाल प्रचण्डले सहकारी ठगी प्रकरणमा रास्वपा सभापति रवि लामिछाने निर्दोष नै रहेको बताएका छन् । 

Watch On

आइतबार चितवनको भरतपुर विमानस्थलमा आयोजित पत्रकार सम्मेलनमा प्रचण्डले सहकारी छानविन प्रतिवेदनले नै लामिछानेलाई दोषि नदेखाएको बताएका हुन् । लामिछाने जोडिएको गोरखा मिडिया नेटवर्कसम्बन्धी केही बिषयमा भने सरकारले अनुसन्धान गर्न सक्ने उनले बताए । प्रचण्डले आफूले भनेर लामिछानेलाई पक्राउ गर्ने वा नगर्ने भन्ने नहुने जिकिर गरे । 

त्यस्तै प्रचण्डले सहकारी छानविनको समिति गठनको बिपक्षमा रहेका केपी ओली नै अहिले प्रधानमन्त्री भएकाले सहकारी ठगी प्रकरणमा दोषीलाई कारवाही गर्न कसैले नरोकेको धारणा राखे । आफु प्रधानमन्त्री हुँदा रवि लामिछानेलाई गलत ढंगले क्लीन चिट दिने काम नगरेको र प्रहरीबाट पाएको आधिकारीक जानकारीपछि सदनबाट लामिछाने निर्दोष रहेको धारणा राखेको उनले बताए ।

‘मैले भनेर पक्रने नपक्रने होइन । सरकार छ सम्बन्धित निकाय छ । र सहकारी सम्बन्धी जुन कार्यदल बन्यो संसदबाट, त्यो बनाउनुपर्छ भन्नेमध्ये एउटा म पनि हो र रवि लामिछाने पनि हो । बरु बनाउनु पर्दैन भन्ने केपी ओली जि हो’, उनले भने, ‘अहिले उहाँ नै प्रधानमन्त्री हुनुहुन्छ । कारबाही गर्न कसैले रोकेको छैन यदि छ भने । तर कार्यदलले सहकारी ठगीमा रवि लामिछानेलाई आरोपित गरेको अहिले पनि छैन ।’

त्यस्तै प्रचण्डले अहिले जनताको बीचमा जाने राम्रो आधार बनेकाले अव एक्लै चूनाव लडेर जित्ने दावी गरे । उनले सरकारको तयारी राम्रो नभएकाले प्राकृतिक प्रकोपबाट धेरै धनजनको क्षति भएको आरोप लगाए । आफुहरु बाढीपहिरो पीडितको समस्या बुझ्न जाँदा सरकार नै नभएको अनुभूति जनताले गरेको उनको भनाइ छ ।