दसैँले छपक्कै छोप्यो तर छैन घर जाने बसको टिकट (भिडियाे)

काठमाडौँ । नवराज पौडेललाई दसैँ मनाउन अछाम पुग्नु छ । तीन दिनदेखि बसपार्क भित्रै काम गर्ने साथीहरूको प्रयासबाट टिकट नपाएपछि उनी सोमबार आफैँ नयाँ बसपार्क पुगे । अछाम जाने बसका सबै काउन्टर धाए । सबै काउन्टरमा टिकट सकिएको सूचना टाँसिएको थियो । 

Watch On

‘मैले ३ दिनदेखि साथीहरूलाई टिकट बुझिदिन भनेको थिएँ तर कहिल्यै पाइएन भने । त्यसैले म आफैँ आज बसपार्क आएको,’ बसपार्कमा भेटिएका नवराजले सिधाकुरासँग भने, ‘बिहानैदेखि बसपार्कमा गएपछि जसोतसो टिकट पाइन्छ भनेर मुखमा पानी पनि नहाली यहाँ (बसपार्क) आएको । यतिबेला भइसक्यो टिकट पाइएको छैन ।’

दसैँ नजिकिँदै गर्दा बस नभएका कारण घर नपुग्ने डरले उनी छट्पटिएका छन् । केही उपाय नलागे उभिएरै भए पनि घर नगई नहुने उनले सुनाए । ‘ टाढाको बाटो छ । उभिएर र रिजर्भमा मात्रै जान पाइन्छ भन्ने हल्ला सुन्छु, हाम्रो कन्तबिजोग भयो,’ उनले भने ।

सुर्खेतका लागि छुट्न लागेको बसमा चढेका केही यात्रुहरुले बस व्यवसायीले क्याबिनको भनेर काटेको टिकटमा सिट नभएको बताए । बसको सिट समेत तोकेर काटिएको टिकट थमाएपनि मुढामा बसेर र उभिएर जानुपर्ने अवस्था आएको एक यात्रु बताउँछन् । ‘क्याबिन भनेर टिकट काटिएको छ । तर, करिडोरमा उभिएर यात्रा गर्नुपर्ने अवस्था आयो,’ ति यात्रुले भने । 

बसपार्क क्षेत्रमा दसैँमा घर जानका लागि टिकट लिन आएका अधिकांश यात्रुहरू टिकट नपाएको गुनासो गर्छन । कतिपय यात्रुहरूका अनुसार सिटको  भनेर बस मालिकहरूले क्याबिन र मुढाको समेत टिकट काटेको उनीहरूको गुनासो छ । 

काठमाडौँबाट धनगढी जान लागेका बसका अर्का एक यात्रुले पनि आफूहरू आफूले सिटको टिकट काटेको तर सिट नपाएको गुनासो गरे । बस व्यवसायीहरूले काठमाडौँबाट लामो दूरीका लागि छुट्ने बसको टिकट बुक भइसकेको भन्दै अहिले नयाँ टिकट बिक्री बन्द गरेका छन् । 

मङ्गलबार सिधाकुरा टिम बसपार्कको टिकट काउन्टरमा पुग्दा पश्चिम जाने अधिकांश टिकट काउन्टरको बाहिर टिकट खाली नभएको सूचना टाँस गरिएको थियो । टिकट नपाएपछि टिकट लिन पुगेका अधिकांश सर्वसाधारण खाली हात फर्किन बाध्य छन् भने कोही टिकटबिना नै उभिएर यात्रा गर्न बसमा कोचिन विवश देखिन्छन् । 

नेपालगञ्ज, धनगढी, लम्की, अत्तरिया लगायत पश्चिम जाने अधिकांश बसको टिकट सकिएको छ । त्यस्तै कोहलपुर, डडेलधुरा, बैतडी, दार्चुला लगायतका स्थानमा जाने बसको टिकट समेत सकिएको बसपार्कको झ्यालमा टाँसिएको सूचनामा उल्लेख छ । 

यातायात व्यवसायीहरूले गत असोज १२ गतेदेखि लामो रुटमा चल्ने सवारीका लागि अग्रिम टिकट खुल्ला गरेका थिए। असोज १० र ११ गतेदेखि परेको अविरल वर्षा र त्यससँगै आएको बाढी र पहिरोका कारण राजमार्ग अवरुद्ध हुँदा सुरुका दिनमा यात्रुहरुको खासै चाप नभएपनि पछिल्ला दिनहरुमा टिकट काट्नेको भिड लागेको थियो ।

असोज २० गते नै फुलपातिसम्मका लागि अधिकांश स्थानका लागि टिकट बुक भइसकेको व्यवसायीहरु जिकिर गर्छन् । सवारीसाधन समयमै गन्तव्यमा नपुग्दा र नफर्किदाँ पनि यात्रुहरुलाई समस्या भएको व्यवसायी हेमराज भट्ट बताउँछन् । 

‘२४ गतेसम्मका लागि सबै टिकट बिक्री भइसकेको छ,’ टिकट काउन्टरमा भेटिएका उनले भने ‘बाटो खराब भएका कारण भनेकै समयमा गन्तव्यमा पुग्न नसक्दा गाडी अभाव भएको हो । केही गरी गाडीहरु समयमै आउने अवस्था बन्यो भने हामी जसरी पनि यात्रु लाने प्रयास गर्छौँ ।’ यातायात व्यवसायीहरुका अगुवा सरोज सिटौला विपद्का कारण बिग्रिएको सडकको मारमा दसैँका यात्रु परेको बताउँछन् । 

यात्रुहरुलाई जसरी पनि सेवा दिने गरी व्यवस्थापनमा ध्यान दिइए पनि सडकमा अत्याधिक जाम भएका कारण बसहरु गन्तव्यमा पुग्न र फर्कन नसकेको उनले बताए । यसवर्ष यात्रुहरुको चाप कम रहेको तर बसहरु नै विपद्का कारण फसेकाले सेवा प्रवाह असजिलो बनेको उनको दाबी छ ।  

‘हामी सेवा दिन दिनरात नभनी खटेका छौँ । यात्रुहरुलाई सकेसम्म टिकट दिएर सिटमै बसेर घर पठाउन मेहनत गरिरहेका छौँ,’ सिटौलाले भने,‘पहिरोका कारण बिग्रिएका सडकमा ठूलो जामका कारण समस्या भइरहेको छ ।’ चाडपर्वको समयमा पर्याप्त सवारी साधन उपलब्ध गराउन सरकारले तदारुकता नदेखाएको यात्रुहरुको आरोप छ ।    

तर जनताले सास्ती पाइरहँदा उता यातायात व्यवस्था विभागका जिम्मेवार अधिकारी भने सम्पर्कविहिन छन् ।