पोखरा । राष्ट्रिय स्वतन्त्र पार्टी (रास्वपा) का कार्यवाहक प्रवक्ता मनिष झाले रास्वपा र यसका सभापति माथि लागेको आरोप विशुद्ध राजनीतिक प्रतिशोध भएको बताएका छन् । 

सभापति पक्राउ विरुद्ध पोखरामा चरणबद्ध आन्दोलन गरिरहेको पार्टीले मङ्गलबार आन्दोलनका तयारी सम्बन्धमा जानकारी दिन आयोजना गरेको पत्रकार भेटघाट कार्यक्रममा झाले यस्तो दाबी गरेका हुन् । 

उनले आफ्नो पार्टी सभापति पक्राउ र उनीमाथि सरकारले लगाएको सबै आरोप प्रतिशोध पूर्ण भएकाले आन्दोलनमा लाग्नु परेको प्रष्ट्याए ।

एमाले नेता महेश बर्तौलाले रास्वपाले गरेको आन्दोलनबारेमा गरेको टिप्पणीप्रति पनि उनले आपत्ति जनाए । नेता बर्तौलाले आफ्ना नेताहरू पक्राउ पर्दा एमालेले न्यायलयलाई सघाएको तर रास्वपाले त्यसो नगरेको भन्ने सञ्चारकर्मीको प्रश्नमा झाले त्यो एमालेका लागि स्वभाविक भएको प्रतिक्रिया दिए ।

‘एमाले र त्यसका नेताहरूलाई थाहा छ की उनीहरु वर्षौदेखि भ्रष्टाचारमा मुछिएका छन् । त्यसै भएर उनका नेता जेल जाँदा उनीहरु प्रतिरक्षा गर्न सक्दैनन्’ नेता झा ले थपे,‘ हाम्रो नेतामाथि सरकारले नियोजित र राजनीतिक प्रतिशोधपूर्ण व्यवहार गरेको छ । यसमा हामी कन्भिन्स छौँ । त्यसकारण सडकमा छौँ । अन्तिम न्याय नपाएसम्म लडिरहन्छौँ ।’ 

नेता झाले सरकारले प्रक्रियागत ढङ्गबाट बोल्ने सबै ढोका बन्द गरेर रास्वपा र नेताहरुमाथि प्रतिशोध साँधेको पनि बताए । संसद बन्द गरिएको, संसदीय समितिहरू लथालिङ्ग पारिएको र आफ्नो कुरा राख्न सडकमा आउनुको विकल्प नभएको उनको भनाई छ । यो आन्दोलन अब नरोकिने भन्दै कार्यवाहक प्रवक्ता झाले भने, ‘अब भ्रष्टहरू यही आन्दोलनबाट लखेटिन्छन् ।’