काठमाडाैँ । मोरङका गोपाल भण्डारीले रोजगारीका लागि युएई जानका लागि अक्टोबर २१ अर्थात कात्तिक ५ गते इसेवाबाट टिकट काटे । ५५ हजार रुपैयाँ तिरेर उनले नोभेम्बर ७ अर्थात कात्तिक २२ गतेका लागि टिकट लिएका थिए । उनी सोही अनुसार मोरङबाट साइत गरेर काठमाडौँ आए । साँझ ५ः४५ बजेको उडानका लागि उनी दिउँसो ३ बजे अघि नै त्रिभुवन अन्तर्राष्ट्रिय विमानस्थल पुगेका थिए । 

उनलाई इसेवाले इन्डिगो एयरलाइन्सको उडान नम्बर 6E - 1158 भएको टिकट जारी गरेको थियो । सोहीअनुसार बोर्डिङ्का लागि उनी इन्डिगो एयरको काउण्टरमा पुगे । काउण्टरका कर्मचारीले उनको टिकट चेक गरे । तर इन्डिगो एयरका कर्मचारीले गोपालको टिकट उनले बुक गरेको दोस्रो दिन अर्थात नोभेम्बर ८ मै क्यान्सिल भइ इसेवालाई नै पैसा फिर्ता भइसकेको बताए । 

त्यसपछि उनले इसेवामा कल गरे । इसेवाले टिकेटिङका लागि इसेवा ट्राभल्स एण्ड टुर नामक कम्पनी खडा गरेको छ । इसेवाका कर्मचारीले बल्लमात्रै गोपालको टिकट बुक भएको दोस्रो दिननै क्यान्सिल भएको बताए । बरु इन्डिगोले म्यासेज नपठाएको, इन्डिगोको कमजोरी भएको देखाउँदै आफ्नो कमजोरी ढाकछोप गर्न खोजे । 

त्यसपछि आफूहरूले मिलाउने भन्दै केही समय विमानस्थलमै बस्न लगाए । साँझ ७ बजेसम्म विमानस्थलमा बस्दा पनि उनलाई इसेवाले त्यस दिनको टिकट व्यवस्थापन गर्न सकेन । बरु उनलाई झापासम्म गएर झापाबाट भारतको बाटो हुँदै जाने उपाय सुझायो । मोरङबाट काठमाडौँ आएका भण्डारीले फेरी झापा पुगेर भारतको बाटो हुँदै आबुधाबी जान सहज थिएन । त्यसैले उनले काठमाडौँबाटै टिकट व्यवस्थापन गर्न माग गरे ।

 पहिले त उनलाई एउटा टिकट होल्डमा राखिएको र रातिसम्म उपलब्ध हुने भनिएको थियो । तर पछि उक्त टिकट नोभेम्बर ११ को मात्रै भएको बताए । त्यसमा पनि ३० हजार रुपैयाँ थप्नुपर्ने भन्न थाले । 

इसेवाका कर्मचारीले व्यवस्थापनले नै ५० प्रतिशत रकम थप गर्न लगाउन निर्देशन दिएकाले यात्रुले पैसा थप नगरे पुरानो पैसा फिर्ता गरिदिने धम्की दिन थाले । 

यात्रुले आफूले अन्य प्रक्रियामा जाने भनेपछि भने इसेवाले नोभेम्बर ११ अर्थात कात्तिक २६ गतेको टिकट बनाइदियो । अहिले भने गोपाल भण्डारी युएई पुगिसकेका छन् । इसेवाको लापरवाहीले आफूले भोगेको सास्ती अरुले नभोगुन्  भनेर उनले सिधाकुरालाई भिडियो रेकर्ड गरेर पठाएका छन् । 

भण्डारीको टिकटका विषयमा इसेवासँग जवाफ माग्न हामीले भण्डारीलाई दिइएको टिकटमा उल्लेख गरिएको इसेवा ट्राभल्स् एण्ड टुरको नम्बरमा फोन गर्यौँ । 

उक्त नम्बर इसेवाकै रहेछ । हामीले टिकट सम्बन्धी बुझ्नुपर्ने भएकाले सम्बन्धित व्यक्ति वा विभागमा सम्पर्क गराउन भन्यौँ । तर इसेवाका प्रतिनिधिले इसेवामा हाम्रो युजर नम्बर मागे । हामीले समाचार प्रयोजनका लागि भएकाले हामीले व्यक्तिगत युजर नम्बर दिन नसकिने भनेपछि आफूहरूले सहयोग गर्न नसक्ने बताए । 

इसेवाबाट आफू फसेपछि भण्डारीले इसेवाबाट टिकट खरिद गर्दा सचेत रहन समेत आग्रह गरेका छन् । 

विस्तृत भिडियाेमा :