रवि लामिछानेलाई थप ४ दिन हिरासतमा राख्न अदालतकाे अनुमति

काठमाडाैँ । राष्ट्रिय स्वतन्त्र पार्टीका सभापति रवि लामिछानेलाई कास्की जिल्ला अदालतले थप ४ दिन हिरासतमा राख्न अनुमति दिएकाे छ ।

Watch On

सहकारी प्रकरणमा ५२ दिन देखि कास्की प्रहरी हिरासतमा रहेका लामिछानेलाई कास्की जिल्ला अदालतले ४ दिन म्याद थप गरेको हो। जिल्ला न्यायाधीश हिमलाल बेलबासेको इजलासले लामिछानेलाई थप ४ दिन हिरासतमा राख्न अनुमती दिएको हो । 

अदालतले रवि लामिछाने र छविलाल जोशीको उच्च रक्तचाप देखिएकाले पूर्ण स्वास्थ्य परीक्षण गराउन समेत आदेश दिएको छ । त्यस्तै लामिछानेलाई बयानका क्रममा चितवन लगिएको र त्यहाँबाट पोखरा ल्याउने क्रममा अमानवीय तरिकाले अड्डासार गरिएको भन्ने विषय उठेपछि न्यायाधीश बेलबासेले हिरासतमा रहँदा मानवअधिकार उल्लङ्गन नगर्न समेत आदेश दिएका छन् । 

आइतबार लामिछानेका तर्फबाट वरिष्ठ अधिवक्ता शुसिल पन्त, हरि सुवेदी र अधिवक्ता डा नारायण कँडेलले बहस गरेका थिए ।

सहकारी रकम अपचलनको आरोप लागेका लामिछानेलाई कास्की प्रहरीको पत्रका आधारमा कात्तिक २ गते नेपाल प्रहरीको केन्द्रीय अनुसन्धान ब्यूरोले पक्राउ गरेर कास्की पठाएको थियो । 

कास्की जिल्ला अदालतले गत मंसिर ९ गते रवि लामिछानेलाई हिरासतमा राखेर अनुसन्धान गर्न पाचौँ पटक म्याद थप गरेको थियो । सो समयमा अदालतले रविलाई १५ दिन हिरासतमा राखेर अनुसन्धान गर्न अनुमति दिएको थियो । सो समय शनिबार सकिएपछि आइतबार कार्यालय खुल्नासाथ उनलाई अदालत उपस्थित गराइएको हो । 

लामिछानेमाथि  पोखराको सूर्यदर्शन, बुटवलको सुप्रिम, चितवनको साहारा, काठमाडौँको स्वर्णलक्ष्मी, पर्साको सानोपाइला सहकारीको रकम अपचलनमा अनुसन्धान भइरहेको छ । प्रहरीले पर्सा बाहेकका सहकारी भएको ठाउँमा लगरे लामिछानेको बयान समेत लिइसकेको छ ।