कास्की अदालतले प्रहरीलाई भन्यो, 'हिरासतमा रहेका रविको मानव अधिकारको रक्षा गर्नु, गराउनु'

काठमाडौँ । जिल्ला अदालत कास्कीले राष्ट्रिय स्वतन्त्र पार्टी (रास्वपा) सभापति रवि लामिछानेसहित हिरासतमा राख्नका लागि म्याद थप गरिएका व्यक्तिहरुको मानव अधिकारको उल्लङ्घन हुने कुनै कार्य नगर्न, नगराउन प्रहरीलाई आदेश दिएको छ । 

Watch On

त्यस्तै अदालतले लामिछाने र छविलाल जोशीको हकमा उच्च रक्तचापको समस्या रहेकाले स्वास्थोपचारका लागि आदेश दिएको छ । जिल्ला अदालतका न्यायाधीश हिमलाल बेल्वासेले आज ४ दिन म्याद थप गर्दै स्वास्थ्य उपचारसँग सम्बन्धित कागजातको प्रतिलिपि अदालतमा पेश गर्न आदेश दिएका हुुन् । 

आदेशमा भनिएको छ, ‘प्रतिवादीहरु रवि लामिछाने र छविलाल जोशीको उच्च रक्तचापको समस्या रहेको भन्ने देखिएको हुँदा चिकित्सकबाट जाँच तथा आवश्यक उपचार गराइ उपचारसँग सम्बन्धित कागजातको प्रतिलिपि यस अदालतमा पेश गर्नु र अनुसन्धानका क्रममा हिरासतमा राख्नका लागि म्याद थप गरिएका व्यक्तिहरुको मानवअधिकारको उल्लङ्घन हुने कुनै कार्य नगर्नु, नगराउनु भनि जिल्ला प्रहरी कार्यालय कास्कीलाई लेखि पठाउनु ।’

अदालतले लामिछाने र जोशीसँगै लिला पछाई, रामबहादुर खना, र कृष्णबहादुर गुरुङलाई पनि एउटै कसुरमा थप चार दिन थुनामा राख्ने गरी अनुमति दिएको छ ।

प्रहरीले उनीहरु तीनैजनामाथि सहकारी ठगी तथा सम्पत्ति सुद्धीकरण सम्बन्धी कसुरमा अनुसन्धान नसकिएकाले म्याद थपका लागि आदेश मागेको थियो ।