राष्ट्रिय मानवअधिकार आयोगमा गएनन् प्रहरी महानिरीक्षक बसन्त कुँवर, पुन: पत्र काटिने

काठमाडौँ । राष्ट्रिय मानवअधिकार आयोगले बयानका लागि बोलाए पनि प्रहरी महानिरीक्षक बसन्त बहादुर कुँवर आयोगमा उपस्थित भएनन् । राष्ट्रिय स्वतन्त्र पार्टी (रास्वपा) का सभापति रवि लामिछानेमाथि चितवनमा प्रहरीले गरेको अमानवीय व्यवहारबारे बयानका लागि राष्ट्रिय मानवअधिकार आयोगले साेमबारका लागि महानिरीक्षक कुँवरलाई बोलाए पनि उनी अनुपस्थित भएका हुन् ।

Watch On

आयोगले सोमबार दिउँसो १२ः३० मा कुँवरलाई आयोगमा उपस्थित हुन पत्र काटेपनि उनले प्रहरी प्रधान कार्यालयका अन्य अधिकारीलाई पठाएको आयोगका प्रवक्ता डा. टिकाराम पोखरेलले जानकारी दिए । ‘हामीले उहाँलाई उपस्थित हुन भनेर पत्र पठाएका थियौँ । उहाँले आफू बाहिर रहेको भन्दै अन्य अधिकारीहरुलाई पठाउनुभएको थियो । उहाँहरुसँग सामान्य सोधपुछ भएको छ । हामी महानिरीक्षकज्यूसँग नै सोधपुछ गर्नेछौँ । त्यसका लागि पुनः पत्र काट्छौँ ।’, प्रवक्ता पोखरेलले बताए । 

प्रहरी महानिरीक्षकलाई बयानमा बोलाइए पनि आयोगमा बयानका लागि एआईजी टेकबहादुर तामाङ र केन्द्रीय प्रवक्ता डिआइजी दानबहादुर कार्की गएका थिए । दिउँसो करिब १२ः३० मा पुगेका उनीहरु २ बजे आयोगबाट बाहिरिएका हुन् । 

सहकारी प्रकरणमा अनुसन्धानका लागि चितवन लगिएका लामिछानेलाई कुँवरको ठाडो निर्देशनमा मंसिर १९ गते मध्यराति १२ः ०५ मा पोखराका लागि हिँडाइएको थियो । दिनभर बयान सकेर आराम गरिरहेका लामिछानेलाई परिवारलाई समेत जानकारी नदिई पोखरा लगिएको थियो । 

अस्वस्थ रहेको अवस्थाका लामिछानेलाई आफन्त र कानुन व्यवसायीलाई समेत झुक्याएर इच्छाविपरीत मध्यराति हिरासत सारिएको घटनाप्रति सर्वत्र प्रश्न उठेको छ । 

भोलिपल्ट  उडानमार्फत पोखरा लैजाने भनिएकोमा सुत्न लागेको अवस्थामा उनलाई जबर्जस्ती गाडीमा राखेर पोखरा लगिएको भन्दै प्रहरीको दुर्व्यवहारमाथि प्रश्न उठिरहेको छ । पोखरा पु¥याइएका लामिछानेको स्वास्थ्य परिक्षण गर्दा रक्तचाप अस्वभाविक देखिएको थियो । 

घटनाको दोस्रो दिन शुक्रबार रवि पत्नी निकिता पौडेलले प्रहरी महानिरीक्षक कुँवरलगायत माथि छानबिन गरी कारवाहीको माग गर्दै आयोगमा उजुरी दिएकी थिइन् । आइतबार राष्ट्रिय स्वतन्त्र पार्टीले पनि आयोगमा उजुरी दिएको थियो ।

उजुरीपछि आयोगले नेपाल प्रहरी प्रधान कार्यालयमा पत्राचार गरि जवाफ मागेको थियो । तर, घटना संवेदनशिल देखिएकाले आज प्रहरी प्रमुखलाई आयोगमै उपस्थित गराएर जवाफ माग्न लागिएको आयोगले जनाएको थियो  ।

रविमाथि अमानवीय व्यवहार प्रकरणमा सोधपुछ गर्न प्रहरी प्रमुख बसन्त कुँवरलाई मानव अधिकार आयोगले बोलायो