भ्यु टावरको अनाधिकृत नक्सा पास गरेपछि काठमाडौँ महानगरका प्रशासकीय अधिकृत गुरागाइँ हटाइए

काठमाडौँ । नक्सा पासमा अनियमितता गरेको भन्दै काठमाडौँ महानगरले प्रमुख प्रशासकीय अधिकृतलाई कारबाही गरेको छ। गत भदौ २७ गते मात्रै सरुवा भएर महानगरमा आएका सहसचिव सरोज गुरागाइँमाथि छानबिन थालिएको महानगरले जनाएको छ । 

Watch On

महानगरका प्रवक्ता नवीन मानन्धरले शुक्रबार पत्रकार सम्मेलन गरेर यस्तो जानकारी दिएका हुन् । ‘आधिकारिक प्रणाली छलेर भवनको नक्सा पास भएको देखिन्छ,’ प्रवक्ता मानन्धरले भने,‘ पास भएको नक्सामा प्रमुख प्रशासकीय अधिकृत सरोज गुरागाईंले हस्ताक्षर गरेका छन् । छानबिन गरेर कानुन बमोजिम कारबाही हुन्छ ।’ 

काठमाडौँ महानगरपालिकाको २८ नम्बर वडामा लामो समयदेखि निर्माणाधीन काठमाडौँ भ्यु टावरको नक्सा पासमा प्रमुख प्रशासकीय अधिकृतले गलत काम गरेको प्रवक्ता मानन्धरले बताए । 

महानगर स्रोतकाअनुसार प्रशासकीय अधिकृत सहसचिव गुरागाइँलाई आजदेखि नै कार्यालय प्रवेशमा रोक लगाइएको थियो । अनियमित ढङ्गबाट उक्त भवनको नक्सापास गरेको भेटिएको स्रोतको भनाई छ ।  

महानगरका अनुसार विवादित भवनको नक्सापासको महानगर भित्रको विधिवत प्रणालीमा अझै नक्सा पास भएको छैन् । भवनको नक्सा पास प्रक्रियामै रहेको प्रणालीमा देखिएपनि प्रमुख प्रशासकीय अधिकृत गुरागाईंले पास गरेको नक्सा पास भने भवन निर्माण कम्पनीले पाइसकेको महानगरले जनाएको छ । 

गत भदौ २७ गतेको ओली मन्त्रिपरिषद् बैठकले प्रदीप परियारलाई हटाएर महानगरमा गुरागाईंलाई पठाएको थियो । गुरागाईं एमाले निकट मानिन्छन् । उनी यस अघि उद्योग मन्त्रालयमा थिए ।