समाज

लगातार पानी परिरहेकोबारे के भन्छ मौसम विभाग?

सिधाकुरा

शनिबार, कात्तिक १४, २०८३

लगातार पानी परिरहेकोबारे के भन्छ मौसम विभाग?

काठमाडौँ । चक्रवात ‘अर्नब’को अवशेषका रूपमा रहेको न्यून चापीय क्षेत्रको प्रभावले देशका विभिन्न स्थानमा भइरहेको वर्षा र हिमपात अपराह्नपछि क्रमशः कम हुँदै मौसममा सुधार आउने भएको छ ।

Watch On

जल तथा मौसम विज्ञान विभागको मौसम पूर्वानुमान महाशाखाका अनुसार उक्त मौसमी प्रणाली हाल पश्चिम नेपाल नजिक रहेको छ । यसको प्रभावले बागमती, गण्डकी, लुम्बिनी र कर्णाली प्रदेशका धेरै स्थानमा तथा कोशी र सुदूरपश्चिम प्रदेशका केही स्थानमा मध्यमसम्मको वर्षा र हिमपात भइरहेको छ ।

त्यस्तै, मधेस प्रदेशका थोरै स्थानमा हल्का वर्षा भइरहेको महाशाखाले जनाएको छ ।

महाशाखाले शनिबार बिहान ९ः३० बजे जारी गरेको विशेष मौसमी बुलेटिनअनुसार अपराह्नसम्म देशका विभिन्न स्थानमा मेघगर्जन र चट्याङसहित हल्कादेखि मध्यम वर्षा तथा उच्च पहाडी र हिमाली क्षेत्रमा हल्कादेखि मध्यम हिमपात हुने सम्भावना छ ।

अपराह्नपछि भने वर्षा र हिमपात क्रमशः कम हुँदै मौसममा सुधार आउने महाशाखाको पूर्वानुमान छ ।

महाशाखाले मौसमी प्रणालीको निरन्तर अनुगमन गरिरहेको र आवश्यकताअनुसार सूचना अद्यावधिक गर्ने जनाएको छ । साथै मौसमसम्बन्धी आधिकारिक तथा अद्यावधिक जानकारीका लागि विभागबाट जारी हुने सूचना नियमित रूपमा हेर्न आग्रह गरेको छ ।

प्रकाशित मिति: शनिबार, कात्तिक १४, २०८३

प्रतिक्रिया दिनुहोस्