समाज

बीपी र कान्तिलोकपथसहितका सडक खुलाउन उपकरण र जनशक्ति परिचालन

सिधाकुरा

शनिबार, कात्तिक १४, २०८३

बीपी र कान्तिलोकपथसहितका सडक खुलाउन उपकरण र जनशक्ति परिचालन

काठमाडौँ । अविरल वर्षाका कारण अवरुद्ध विभिन्न राष्ट्रिय राजमार्ग खुलाउन आवश्यक जनशक्ति र उपकरण परिचालन गरिएको भौतिक पूर्वाधार विकासमन्त्री सुनिल लम्सालले बताएका छन् ।

Watch On

उनका अनुसार बीपी राजमार्ग, कान्तिलोकपथ र मालढुङ्गा–बेनी–जोमसोम सडकका विभिन्न स्थानमा पहिरो, लेदो तथा गेग्रान जम्मा हुँदा यातायात अवरुद्ध भएको छ ।

बीपी राजमार्गको पिन्थलीलगायतका स्थानमा लेदो तथा गेग्रान जम्मा भएको छ । उक्त अवरोध हटाएर सडक सञ्चालनमा ल्याउने गरी काम भइरहेको मन्त्री लम्सालले बताएका छन् ।

त्यस्तै, कान्तिलोकपथअन्तर्गत मकवानपुर खण्डमा सडक सञ्चालनमा रहे पनि ललितपुरको छपेलीलगायतका स्थानमा अवरोध भएको छ ।

मालढुङ्गा–बेनी–जोमसोम सडकअन्तर्गत लामाखेत, महभीर, कागबेनी, छुसाङ र छोसेरलगायतका स्थानमा सडक अवरुद्ध भएको छ । ती स्थानमा पनि अवरोध हटाउन जनशक्ति र उपकरण परिचालन गरिएको उनले जनाएका छन् ।

वर्षा जारी रहेकाले मौसम र सडक सुरक्षाको अवस्था मूल्याङ्कन गरेर मात्रै यातायात सञ्चालन गरिने मन्त्री लम्सालले बताएका छन् ।

अवरुद्ध सडक यथाशीघ्र सञ्चालनमा ल्याउन सडक विभाग र मातहतका डिभिजन कार्यालयलाई सक्रिय रूपमा परिचालन गरिएको उनले सामाजिक सञ्जालमार्फत जानकारी दिएका छन् ।

प्रकाशित मिति: शनिबार, कात्तिक १४, २०८३

प्रतिक्रिया दिनुहोस्