नेपाली गेमिङ उद्योगलाई सहज नीति र कर छुटको व्यवस्था गर्ने प्रधानमन्त्रीको घोषणा

काठमाडौँ । प्रधानमन्त्री बालेन्द्र शाहले नेपाली गेमिङ उद्योगलाई अन्तर्राष्ट्रिय स्तरमा विस्तार गर्न सहज नीति, कर व्यवस्था र व्यावसायिक वातावरण निर्माण गर्ने बताएका छन् ।

Watch On

उनले नेपालमै बनेका लुडो र कलब्रेक गेम विश्वभर लोकप्रिय रहेको उल्लेख गर्दै नेपाली गेमिङ कम्पनीलाई उद्योगका रूपमा विकास गर्ने सरकारको योजना सार्वजनिक गरेका हुन् ।

सामाजिक सञ्जाल फेसबुकमार्फत उनले लुडो गेम करिब २० करोड पटक र कलब्रेक गेम १५ करोडभन्दा बढी पटक डाउनलोड भएको उल्लेख गरेका छन् । नेपालमा सयौँ युवा गेम एप निर्माणमा सक्रिय रहेको पनि उनले बताएका छन् ।

प्रधानमन्त्री शाहका अनुसार सरकारले गेम डेभलपरहरूलाई बोलाएर उनीहरूका समस्या र गेमिङ क्षेत्रको विकासका सम्भावनाबारे छलफल गरेको छ । छलफलपछि यो क्षेत्रलाई सहज बनाउने र उद्योगका रूपमा अघि बढाउने विषयमा गृहकार्य सुरु गरिएको उनले जनाएका छन् ।

'नेपालबाटै हामीले ग्लोबल युनिकर्न कम्पनी बनाउन सहज पार्नुपर्ने नियम, वातावरण सबै पुनरावलोकन गर्नेछौँ,' उनले लेखेका छन् ।

उनले सूचना प्रविधि क्षेत्रका उत्पादन तथा निर्यातको सम्भावनालाई ध्यानमा राख्दै कर प्रणाली र नीतिमा सुधार गर्ने पनि बताएका छन् । अन्तर्राष्ट्रिय आम्दानीसम्बन्धी विद्यमान नियमलाई थप सहज बनाउने, कम्पनीले सहज रूपमा आम्दानी गर्न र पुनः लगानी गर्न सक्ने वातावरण बनाउने उनको भनाइ छ ।

त्यस्तै, गेम जाम, स्टार्टअप कार्यक्रम, ह्याकाथन तथा सूचना प्रविधि क्षेत्र र नेपाल राष्ट्र बैंक एवं अर्थ मन्त्रालयबीच नियमित अन्तरक्रिया गराउने कार्यक्रम सञ्चालन गर्ने उनले बताएका छन् । समग्र सूचना प्रविधि उत्पादन तथा गेमिङ उद्योगलाई लाभ पुग्ने इकोसिस्टम निर्माणमा सरकारले लगानी गर्ने उनको घोषणा छ ।