दलित परिवारको उठिबास लाएर महायज्ञको मण्डप, घटना ढाकछोप गर्न पुरानो मितिमा मन्जुरीनामा

सिरहा । सिरहाको औरही ५ मा महायज्ञ लगाउने नाममा एक दलित परिवारको उठिबास बनाएर महायज्ञस्थल बनाइएको छ । औरहीस्थित हुलाकी सडक छेउमा चैत १७ गते देखि विष्णु महायज्ञ लगाउने भन्दै बजरङ्गी बाबाको निर्देशनमा गाउँपालिका अध्यक्ष शिवजी यादवले दीपक मलिक डोमको घरनै भत्काइदिएका छन् । 

Watch On

महायज्ञ स्थलमा दलित वरिपरि हिँडडुल समेत गर्न नहुने भन्दै दलितको घर भत्काएर, घर भएको जग्गाको माटो समेत फालिएको छ । यो ठाउँमा पहिले स्थानीय दीपक डोमको परिवार ३० वर्षदेखि बस्दै आएका थिए । सरकारले जनता आवास कार्यक्रम मार्फत ५ वर्ष अघि मात्रै उनीहरूका लागि २ कोठे पक्की घर बनाइदिएको थियो । तर बजरङ्गी बाबालाई यही ठाउँमा विष्णु महायज्ञ लगाउन मन लागेपछि दिपकको परिवारको उठिबास लागेको छ । तर सो स्थानमा भएका अन्य व्यक्ति तथा समुदायका घर भने भत्काइएको छैन । 

बजरङ्गी बाबाको निर्देशन अनुसार फागुन १० गते गाउँपालिका अध्यक्ष शिवजी यादवले डोजर पठाएर उनीहरूको घर भत्काइदिएका हुन् । यसका लागि पूर्व वडाध्यक्ष दिलीप यादवले समन्वय गरेका थिए । घर भत्काएपछि उनीहरूलाई मानवबस्ती भन्दा ५ सय मिटर पर बाँसले बारेर सानो टहरामा सारिएको छ । जहाँ न खानेपानी छ न बिजुली बत्ती । आफ्नो घरवास उठिबास लाग्दा समेत डोम परिवार गाउँपालिका र बजरङ्गी बाबाका विरुद्धमा बोल्ने सकेका छैन । गाउँपालिकामा नै सरसफाइको काम गर्दै आएका दीपक र उनकी श्रीमती अनिता डोमलाई ज्यालादारीमा भएको काम पनि गुम्ने डरले कतै पनि उजुरी गरेका छैन । 

उनीहरूको डर र बाध्यताको फाइदा उठाउँदै उठीबास लाग्दा समेत प्रहरी प्रशासन मौन बसेको थियो । यस विषयमा प्रश्न गर्दा प्रहरी भने समाजको विषय भएर आफूले केही गर्न नमिल्ने भन्दै पन्छिन खोजे । गाउँपालिकाले नै घर भत्काइदिएपछि उनीहरूले न्यायका लागि लड्ने आँट गर्न नसकेको गुनासो गर्छन् । अनिताका अनुसार बजरङ्गी बाबाले भनेबमोजिम गाउँपालिका अध्यक्ष शिवजी यादव र पूर्ववडाध्यक्ष दिलीप यादव आफैं आएर यहाँ महायज्ञ गर्नुपर्ने भन्दै घर भत्काइदिएको थिए । 

आफूहरू दलित भएकै कारण महायज्ञ गर्नका लागि आफ्नो घर भत्काएर, दलित बसेको जमिन भन्दै माटो समेत खनेर फाल्दा निकै असह्‍य पीडा भएको छ उनीहरूलाई ।

गाउँपालिका अध्यक्ष भन्छन्ः संयोग त्यस्तो पर्यो

गाउँपालिका अध्यक्ष शिवजी यादवले भने कृषि बजार लगाउने योजनमा घर सारिएको दाबी गर्छन् । उनले दिपकको परिवारसँगको मञ्जुरीमै कृषी बजारका लागि उनीहरूलाई अन्यत्र आवासको व्यवस्था गरेर घर भत्काएको बताउँछन् । महायज्ञ आयोजना हुनु र उनीहरूको घर भत्काउनु संयोग मात्रै भएको दाबी गर्छन् । तर डोम परिवारलाई विस्थापित गराइएको जग्गा नजिकै पुजाको मण्डप बनाइएको छ । 

अहिले पनि महायज्ञस्थल सजाउने काम धमाधम भैरहेको छ । यो विषय सार्वजनिक भएपछि अहिले सरोकारवाला निकाय गाउँमा पुगेका छन् । तर महायज्ञ आयोजना गर्ने भनिएका बजरङ्गी बाबा देखि गाउँपालिका अध्यक्ष तथा पूर्ववडा अध्यक्ष सम्पर्क विहिन भएका छन् । दलित परिवारको उठिबास गराउदा नबोलका स्थानीयह?ले अहिले भने महायज्ञका नाममा डोम परिवार माथि अन्याय भएकोमा बोल्न थालेका छन् ।

गाउँपालिकाले बनायो फर्जी मञ्जुरीनामा

विषय सार्वजनिक भएपछि घटना ढाकछोप गर्न गाउँपालिका लागेको छ । गाउँपालिकाले दिपकले गरेको मन्जुरीनामाको कागज सार्वजनिक गरेको छ । अहिले सर्वत्र घटनाको विरोध चर्कीएपछि घर भत्काएको भोलिपल्टको मिति राखेर दीपकको नामको मन्जुरीनामा बाहिर आएको छ । पीडित परिवारका अनुसार फागुन ११ गतेको मिति राखिएको मन्जुरीनामा चैत ६ गते मात्रै बनाइएको हो । मन्जुरीनामाका लागिसमेत उनीहरुलाई झुक्याइएको छ । दीपकले भने ‘पालिकाकै कर्मचारी मनोज यादवले ‘जग्गाको प्रमाण हो, सही गरेर एकप्रति सुरक्षित राख्नू’ भन्दै हेर्नै नदिई ल्याप्चे लगाउन लगाए, म धेरै लेख–पढेको छैन, आफ्नै पालिकाका कर्मचारीले भनेपछि होला भन्ने भयो,’ । उक्त मन्जुरीनामा पत्रमा भनिएको छ, त्यो जग्गामा कृषि बजार व्यवस्थापन गर्न ठेक्का प्रक्रियामा गइसकेकाले म आफ्नै राजीखुसीले सुन्दर जनता माविभन्दा पश्चिम बसोबास गरेको छु । यसमा कुनै किसिमको दाबीविरोध गर्नेछैनौँ, गरे यसै मन्जुरीनामाबाट बदर गरिदिनुभएमा मेरो मन्जुरी छ ।’