काठमाडौँ । नेपाली कांग्रेसका महामन्त्रीद्वय गगन थापा र विश्व प्रकाश शर्माले कुलमानलाई सरकारले हटाउने निर्णय गरेको असन्तुष्टि व्यक्त गरेका छन् । सामाजिक सञ्जालमा आफ्नो अभिव्यक्ति दिदै दुवै महामन्त्रीले कुलमान हटाउनु सरकारको गलत कदम भएको औँल्याएका छन् । 

महामन्त्री थापाले आफूहरु सरकारको डेलिभरीबाट बढिरहेको असन्तुष्टि हटाउन दिन रात काम गरिरहेको अवस्थामा सरकार चाही आफैँ असन्तुष्टिको आगोमा मट्टितेल हाल्ने काम गरेको बताएका छन् । उनले लेखेका छन्ः 

आम नागरिकमा असन्तुष्टि बढ्दो छ। त्यही असन्तुष्टिको तावामा स्वार्थको रोटी सेक्न उद्धत एउटा तप्का सलबलाइरहेको छ। यस्तो बेला सरकारको डेलिभरीबाट त्यो असन्तुष्टिलाई सम्बोधन गर्दै आगो नै निभाइदिऊ भनेर हामी दिन रात नभनी मेहनत गर्ने सरकार चाही आफैँ असन्तुष्टिको आगोमा मट्टितेल हाल्ने काम गर्ने? 
हामीले यस्तो नगरौँ है भन्दा सुनेको जस्तो पनि गर्ने तर निर्णय फेरि यस्तो गलत गर्ने?
मन्त्रीहरूले बाटो बिराउँदा प्रधानमन्त्रीले समाल्नु पर्ने हो.. तर विडम्बना त्यो भएन,
निर्णय गलत छ,सरकार! उल्टो बाटो हिँडेर सही गन्तव्य पुगिँदैन।

त्यस्तै अर्का महामन्त्री विश्वप्रकाश शर्माले कुलमान घिसिङलाई पदबाट हटाउन काँग्रेस पदाधिकारी तहको सहमति नभएको प्रस्ट्याएका छन् । उनले भनेः 

कुलमान घिसिङलाई पदबाट हटाउन काँग्रेस पदाधिकारी तहको सहमति थिएन ! बाँकी पदावधि काम गर्न दिन र नहटाउन आन्तरिक तथा सार्वजनिकरुपमै सजग गराइएको थियो !
कार्वाही योग्य केही भए, पछिपनी गर्न मिल्थ्यो ! केही राम्रा प्रयास छायांमा पार्नेगरी सरकारले कुलमान हटाउनु हुन्न थियो ! सरकारको यो निर्णय समयोचित विल्कुलै भएन ! यसप्रती खुला र प्रष्ट रूपमा विमति छ !