कटारी प्रहरीद्वारा  १० हजार बढी ट्याब्लेट लागू औषधसहित ७ जना पक्राउ

उदयपुर । उदयपुरमा ठूलो मात्रामा लागु औषधसहित प्रहरीले ७ जनालाई पक्राउ गरेको छ। ईलाका प्रहरी कार्यालय कटारीको टोलीले कटारी बजारबाट ७ जनालाई नियन्त्रणमा लिएको हो।

प्रहरीले मंगलबार कटारी नगरपालिका–४ कान्छी बजार बाट १० हजार ४६३ ट्याबलेट नियन्त्रित लागू औषध र १ सय ग्राम प्रतिबन्धित लागू औषध गाँजा सहित उनीहरुलाई पक्राउ गरेको हो । पक्राउ पर्नेहरुमा कटारी नगरपालिका–४ बस्ने अनमोल मगर, आरती राउत, सरद कुमार सुनुवार, विक्रम साशंकार–७ बस्ने हरी बहादुर तामाङ ,वडा नम्बर ८ का भक्त बहादुर तामाङ  र सोम कृष्ण राई रहेका छन्। 

पक्राउ परेका उनीहरुको साथबाट २ लाख ४७ हजार ७ सय २० रुपैयाँ नगद, २ वटा मोटरसाइकल र ६ वटा मोबाइल फोन समेत बरामद गरिएको ईलाका प्रहरी कार्यालय कटारीका प्रमुख डीएसपी कमल बजगाईले बताए । बजारमा प्रतिबन्धित लागू औषध ओसारपसार तथा बिक्री वितरण भइरहेको गोप्य सूचनाको आधारमा ईलाका प्रहरी कार्यालय कटारीबाट खटिएको टोलीले उनीहरुलाई नियन्त्रणमा लिएको हो । 

पछिल्लो समय कटारीबाट लागु औषधको बिक्री वितरण तथा कारोबार बढेको छ । प्रहरीले पनि त्यस्ता कार्यमा संलग्न हुनेहरुलाई पक्राउ गर्ने क्रम पनि बढेको छ । गत पुष १६ गते पनि ईलाका प्रहरी कार्यालय कटारीले ५ जना व्यक्तिसहित ६४७ ट्याबलेट लागू औषध, दुई थान मोटरसाइकल, छ थान मोबाइल र नगद ८ हजार रुपैयाँ बरामद गरेको थियो ।

पछिल्लो समय ईलाका प्रहरी कार्यालयले आफूहरुले लागूऔषधको अवैध कारोबारविरुद्ध विशेष निगरानी गरिरहेको जनाएको छ । कटारी प्रहरीले यस किसिमका गैरकानुनी गतिविधिलाई रोक्न कडा निगरानी र कारबाहीलाई प्राथमिकतामा राखेको डिएसपी बजगाईंको भनाई छ ।