मेरिल्याण्ड । अमेरिकाको मेरिल्याण्ड राज्यका रहेका नेपालीहरूको संस्था  बाल्टिमोर एसोसिएशन अफ नेप्लिज ईन अमेरिका(बाना) को नयाँ नेतृत्वका लागि अप्रिल ६ (भोलि) निर्वाचन हुँदैछ ।

बानाको नयाँ नेतृत्वका लागि कोशिस भण्डारीले स्वतन्त्र उम्मेदवारहरूको प्यानल नै बनाएर चुनावमा होमिएका छन् भने जितेन्द्र गुरुङ (जितेन) र लक्ष्मी भारतीको नेतृत्वमा छुट्टाछुट्टै प्यानल बनाएर भिड्दै छन् । जितेन नेपाली काँग्रेस निकट उम्मेदवार हुन् ।

स्वतन्त्र उम्मेदवार कोशिस भने अमेरिकाको मेरिल्याण्ड राज्यका विधायक सदस्य डा. ह्यारी भण्डारीका भाइ हुन् । सिमित ठाउँमा रहेका नेपाली समाजको चुनाव भएपनि निर्वाचनपूर्व तीनवटै समुहले चुनाव प्रचारप्रसारलाई व्यापक बनाएका छन् । बनामा ४ हजार ८ सय बढी नेपालीहरू सदस्य रहेका छन् ।

नयाँ कार्यसमितिको कार्यकाल ३ वर्ष हुन्छ । स्वतन्त्र उम्मेदवार कोशिस भण्डारीले आफूले वृहत बानाको अवधारण बनाएर समकालीन , मध्यकालीन र दीर्घकालीन योजना सहित टिमनै खडा गरी निर्वाचनमा होमिएको बताउँछन् ।

उनले विज्ञ र युवा टिम बनाएर नेपालीहरूको घरघरमा पुग्दा पाएको सन्देशले आफू उत्साहित भएको बताए । भण्डारी सफ्टवेयर इन्जिनियर हुन् । उनीसँग दाजु ह्यारीको टिममा बसेर सामाजिक काम गरेको राम्रो अनुभव पनि रहेको छ ।

उनको टिममा वरिष्ठ उपाध्यक्षको उम्मेदवार डा.एकता कोईराला, उपाध्यक्षमा गणेश भट्टराई, महासचिवमा तारा खरेल न्यौपाने, सचिवमा जनक पुन मगर, कोषाध्यक्षमा राजेन्द्र रेग्मी, वाेर्ड  अफ डाईरेक्टरमा अर्जुन क्षेत्री, डम्मर वस्नेत, डा‍.कृष्ण विष्ट , निर्णय प्रधान र राजिव क्षेत्री उम्मेदवार रहेका छन् ।

सन् २००५ मा स्थापना भएको सामाजिक संस्था बाना नेपाली समाजको हित र विकासका लागि काम गरिरहेको नेपाली संस्था हो ।