अमेरिकाले बन्द गर्यो एमसीसी, नेपालको परियोजना के हुन्छ ?

काठमाडौँ । अमेरिकाले सञ्चालन गर्दै आएको मिलेनियम च्यालेन्ज कर्पोरेसन (एमसीसी) परियोजना बन्द हुने भएको छ । एलन मस्कले नेतृत्व गर्ने डिपार्टमेन्ट अफ गर्भमेन्ट एफिसेन्सी (डज) ले बन्द गर्ने निर्णय गरेको सिएनएनले जनाएको छ । 

Watch On

संघीय खर्च कटौती गर्ने अभियानअन्तर्गत यस्तो कदम चालिएको हो । मंगलबार एमसीसी का कर्मचारीहरूलाई इमेलमार्फत “चाँडै कर्मचारी र कार्यक्रमहरूमा ठूलो कटौती हुने” जानकारी दिइएको सिएनएनले उल्लेख गरेको छ । 
 
यसअघि पनि ट्रम्प प्रशासनले युएसएआईडी लगायत निकायहरूलाई उपलब्ध गराउँदै आएको सहायता बन्द गरेको थियो । तीमध्ये थुप्रै कदमहरूविरुद्ध मुद्दा पनि दायर भएका छन्।

एमसीसी सन् २००४ मा अमेरिकी कङ्ग्रेसले स्थापना गरेको निकाय होनेपाल लगायतका दर्जनौं विकासोन्मुख देशहरूलाई पूर्वाधार निर्माण र नीति सुधारका लागि समयसीमित अनुदान प्रदान गर्दै आएको छ । 

०७४ भदौ २९ मा नेपाल सरकार र एमसीसीबीच भएको सम्झौता अनुसार ०८० भदौ १३ देखि परियोजना कार्यान्वयन सुरु भएको थियो। सुरुआती सम्झौतामा ६९ करोड ७० लाख डलर (करिब ९२ अर्ब) परियोजनामा अमेरिकी सरकारले ५० करोड डलर र नेपाल सरकारले १९ करोड ७० लाख डलर व्यहोर्ने उल्लेख छ। गत पुसमा अमेरिकी सरकारले परियोजनाका लागि थप ५ करोड डलर दिने घोषणा गरेको थियो । तर अमेरिकाको यो निर्णयपछि यी परियोजनाहरु अघि बढ्नेमा अन्यौलता बढेको छ ।