गर्भिणी भैँसीमाथि मान्छेले देखाएको क्रूरता ! (भिडियाे)

वैशाख १७ गते । मध्यरातकाे समय । बागलुङको ताराखोला गाउँपालिका वडा नम्बर १ बुकेनीमा मानिसहरू मस्त निद्रामा थिए । पारीपट्टिको गाउँबाट बुकेनीमा रहेको एक घरमा दनदनी आगो दन्केकाे देखियो । 

Watch On

बुकेनी पारीका गाउँका गाउँलेले आगो लागेको भन्दै हल्लाखल्ला गरे । त्यसपछिमात्रै बुकेनीका गाउँलेले गाउँमा आगो लागेको थाहा पाए ।

उनीहरू हतार हतार आगो निभाउन गए । उनीहरू पुग्दा आगो लागेको घर नभएर गोठ रहेको पाइयो । गाउँलेहरू पुग्नु अगावै खरले छाएको गोठ पुरै जलिसकेको थियो । त्यहाँ घर बनाउनका लागि जम्मा गरिएका केही काठका फलेकहरू पनि थिए । त्यो पनि जलिरहेको थियो । आगोले गोठमा जल्ने सबै कुराहरू जलाइसकेको थियो । स्थानीयले जेनतेन आगो निभाए ।

उक्त गोठ थियो, स्थानीय सनम विश्वकर्माको । उनी त्यति बेला पोखरामा थिए । घरमा उनका आमा बाबु मात्रै थिए । गोठ अलि कोल्टे ठाउँमा थियो । त्यसमाथि मध्यरात १२ बजेको मस्त निद्रामा रहेका कारण गोठ धनी र छिमेकीले समेत आगो लागेको पत्तो पाएनन् ।

उक्त गोठमा डेढ वर्षको एउटा पाडो र करिब ९ महिनाको एउटा गर्भवती भैँसी बाँधिएको थियो । तर स्थानीय र गोठ धनी पुग्दा उनीहरूले गोठमा न भैँसी देखे, न पाडो नै । 

आगोको रापले शरीरको बाहिरी भाग पुरै जलेको भैँसी जेनतेन दाम्लोबाट उम्किन सफल भएछ । अत्तालिएर गोठबाट भागेको भैँसी केही पर भेटियो । आँखा, मुख तथा शरीरका सबै छाला पूर्ण जलेर छट्पटाइहेको अवस्थामा भैँसी भेटियो । तर डेढ वर्षको पाडो अझै भेटिएन । 

आगो पूर्णरुपमा निभाएर स्थानीयले आगो लागेको संरचना पन्छाउँदा भेटियो, पाडो त गोठमै जलिसकेको रहेछ । जलेको पाडोको केही अवशेषहरू गोठमै भेटियो । गोठ जल्दै गर्दा माथिबाट छानो झरेर पाडोलाई पुरेपछि पाडो त्यहीँ जलेको हुनसक्ने स्थानीयको अनुमान छ । 

घरमा परेको बज्रपात सनमले राति नै थापा पाए । भोलिपल्ट बिहानै सनम पोखराबाट घर पुगे । उनी पुग्दा गोठको अवशेष मात्र बाँकी थियो । ब्याउन १ महिना मात्र बाँकी भएको भैँसीको आँखा, थुतुनो तथा बाहिरी शरीर पुरै जलेको थियो । 

बारीको काल्लामुनी रहेको भैँसीले धुकधुकी सास फेरिरहेको थियो । उता आमा मुर्छा परेर रोइरहेकी थिइन् । सो दृश्यले सनमलाई असह्य पीडा दियो । त्यो पीडा उनले सामाजिक सञ्जालमा पोस्ट गरेको भिडियोमा पनि प्रस्टै बुझिन्छ ।

त्यसपछि सनमले भैँसीलाई जलन कम होस भनेर स्थानीय स्तरमा उपलब्ध औषधीको लेप लगाइदिए । भैँसीले घाँस पानी केही खान सकेको थिएन । २० गते शनिवारका दिन दिउँसो गर्भिणी भैँसीको प्राण गयो ।

ऋण गरेर किनिएको भैँसी ब्याउन केही दिन मात्रै बाँकी थियो । 

भैँसीले प्राण त्यागे पनि उसको पेटमा अर्को प्राण थियो । नेपाली समाजको मान्यताले गर्भ बोकेकी भैँसीलाई खाल्डोमा हाल्न दिएन । भैँसीको पेटमा भएको पाडो निकालियो । मृत भैँसीको पेटबाट निकालिएको पाडोको धुकधुकी अझै चलिरहेको थियो । तर उक्त पाडोले पनि केही बेरमा प्राण त्याग्यो । त्यसपछि भैँसी र पाडोलाई एउटै खाल्डोमा पुरियो ।

सनमका अनुसार उक्त गोठमा आफैँ आगो लाग्ने कुनै सम्भावना नै छैन । किनभने त्यहाँ बिजुली जोडिएको छैन । कुँडो पकाउने वा गोठमा आगो बाल्ने गरिएको पनि छैन । कसैले आगो लगाउनु बाहेक गोठमा आगो लाग्ने कुनै कारण नभएको सनम बताउँछन् । अब प्रश्न उठ्छ गोठमा आगो कसले किन लगायो ? 

यो विषयमा अहिले प्रहरीले पनि अनुसन्धान गरिरहेको छ । सनमले शंकास्पदहरुको विवरण प्रहरीलाई उपलब्ध गराएका छन् । 

सनमको परिवारको अवस्था त्यति राम्रो छैन । ऋण खोजेर किनेको भैँसी गोठ जलेसँगै जल्यो, जसको ऋण सनमले अझै तिरिसकेका छैनन् । हुर्किँदै गरेको पाडो पनि मर्यो । 

आफूले वर्षाैँदेखि पाल्दै आएको प्राणीहरुको दर्दनाक मृत्यु देख्दा सनमकी आमा विचलित भएकी छिन् । आमालाई यो पीडा बिर्साउन र आफ्नै पुरानो दैनिकीमा फर्काउन अर्को भैँसी किनिदिने सनमको इच्छा छ ।