सप्तरी । सप्तरीको डाक्नेश्वरी नगरपालिका–७ ब्रह्मपुर सिघिँयाकी २२ वर्षीया सनिजा खातुन आफ्नै सासु आयशा खातुन र नन्द मरियम खातुनबाट कुटिएर घाइते भएकी छन् । कुटपिटमा उनका दुई वर्षीय छोरासमेत घाइते भएका छन् । 

सनिजा र उनका छोरा हाल गजेन्द्र नारायण सिंह अस्पतालको आकस्मिक कक्षमा उपचाररत छन् । पीडितले कुटपिटमा संलग्न सासु र नन्दविरुद्ध प्रहरीमा उजुरी दिएकी छन् । उनले विवाहपछि दर्ता प्रक्रिया अघि बढाउन आग्रह गर्दा परिवारबाट नै मानसिक र शारीरिक यातना पाएको बताएकी छन् ।

सनिजाको मोहम्मद आकुबसँग २०७८ साल चैत ८ गते मुस्लिम परम्परा अनुसार निकाह (विवाह) भएको थियो। श्रीमान् रोजगारीको सिलसिलामा दुई वर्षदेखि कतारमा छन् । विवाहपछि श्रीमानले विवाह दर्ता र सन्तानको जन्मदर्ता गराइदिन फोनमार्फत पटक–पटक आग्रह गर्दा झर्किने र ‘किन हतार गरेको’ भन्ने प्रतिक्रिया दिने गरेको सनिजाको भनाइ छ ।

सोही विषयमा विवाद हुँदा ९ महिनाअघि श्रीमानले फोनबाटै  ‘तलाक’ (सम्बन्ध विच्छेद) को घोषणा गरेको सनिजा बताउँछिन् । श्रीमान्ले फोनबाटै तलाक घोषणा गरेपछि उनी विवाहदर्ता र नागरिकता बनाउन संघर्षरत छिन् । ‘मैले बच्चाको जन्मदर्ता र मेरो नागरिकताको लागि उहाँसँग धेरै पटक आग्रह गरेँ । उहाँले सधैँ अहिले किन चाहियो मात्रै भन्नुहुन्थ्यो । एक दिन उहाँले मलाई फोनबाट तलाक दिनुभयो ।’ 

उनले यही विषयमा घरायसी विवाद बढ्दै जाँदा आफ्नो गरगहना समेत चोरी भएको सुनाइन् । सनिजाले मंसिर १९ गते आफन्तको विवाह समारोहमा गएका बेला नन्द मरियमले उनका सुनचाँदीका गरगहना चोरी गरेको आरोप लगाएकी छन् । उनले इलाका प्रहरी कार्यालय पातो हुँदै जिल्ला प्रहरी कार्यालयसम्म उजुरी दिएकी छन् । तरहालसम्म दोषीमाथि कारबाही नभएको गुनासो गरिन् । 

सनिजाकी आमाले अदालतमा अंश र मानाचामलको मुद्दा दायर गरेकी छन् । उनले फोनमार्फत दिइएको ‘तलाक’ फिर्ता गराउन र छोरीलाई सुरक्षित रूपमा श्रीमान्संग बस्ने वातावरण मिलाइदिन आग्रह गरेकी छन् । यद्यपि सासुले भने घरायसी झगडामा आफूलाई पनि चोट लागेको दाबी गरेकी छन् ।

जिल्ला प्रहरी कार्यालय सप्तरीका प्रवक्ता प्रहरी नायब उपरीक्षक जितेन्द्र कुमार वस्नेतले दुवै पक्षलाई झिकाएर अनुसन्धान भइरहेको र दोषी पाइए कानुनी कारबाही गरिने बताएका छन् ।