निजामती सेवा विधेयकमा षड्यन्त्र गर्नेमाथि छानबिन गरेर कारबाही गर्नुपर्छ : प्रचण्ड

काठमाडौँ । नेपाल कम्युनिस्ट पार्टी (माओवादी केन्द्र) का अध्यक्ष तथा प्रधानमन्त्री पुष्पकमल दाहाल ‘प्रचण्ड’ले संघीय निजामती सेवा विधेयक पारित गर्ने क्रममा गम्भीर षड्यन्त्र भएको दाबी गरेका छन्। मंगलबार पेरिसडाँडामा आयोजित वाइसिएल नेपालको केन्द्रीय पदाधिकारी बैठकमा बोल्दै उनले विधेयकमा “चलखेल र छेडखानी गर्ने प्रवृत्ति” को खोजी गरेर कारबाही गर्नुपर्ने बताएका हुन्।

‘परिवर्तनका उपलब्धिहरू उल्ट्याउने षड्यन्त्र हुँदै आएको छ। संघीय निजामती विधेयकमा पनि षड्यन्त्र भएको छ,’ प्रचण्डले भने, ‘यो विधेयकमा कसले बदमासी गर्‍यो, त्यसको छानबिन गरी चलखेल तथा छेडखानी गर्ने प्रवृत्तिमाथि कारबाही गराउनतर्फ हामी लागेका छौं।’

उनले विधेयक संसदको राज्य व्यवस्था तथा सुशासन समितिबाट लामो छलफलपछि तय भए पनि प्रतिनिधि सभामा पेश हुँदा ‘बाहेक’ भन्ने शब्द थपिएकाले विधेयकको मर्म नै बद्लिएको बताएका छन्। यस विषयमा चौतर्फी आलोचना भइरहेको छ।

माओवादी अध्यक्ष प्रचण्डले संविधान र जनताको रगत–पसिनाबाट प्राप्त उपलब्धिहरू उल्ट्याउने प्रयास अहिले पनि जारी रहेको भन्दै पार्टीलाई सजग रहन आह्वान गरे। ‘यथास्थिति र प्रतिगमनको प्रयास भइरहेकै अवस्थामा हामीले पार्टीको अभियान रोकेर प्रतिवाद गरेका थियौं, अहिले फेरि त्यही प्रवृत्ति देखिएको छ,’ उनले भने।

पार्टी पदाधिकारी बैठकपछिको पत्रकार भेटघाटमा पनि प्रचण्डले यस विषयमा गम्भीर छानबिनको माग गरे। ‘समितिको निर्णय प्रक्रिया र त्यसलाई फुल हाउसमा लैजाँदाको क्रममा कहीँ न कहीँ कर्मचारीतन्त्र भित्रैबाट चलखेल भएको देखिन्छ,’ उनले भने, ‘तर अहिले कसैलाई लक्षित गरेर आरोप लगाउने स्थितिमा छैन।’

त्यसैगरी, उनले वाइसिएल नेपाललाई पार्टीको विचार, विधान र लाइनप्रति पूर्ण प्रतिबद्धतासहित अघि बढ्न निर्देशन दिए। ‘वाइसिएल नेपाल पार्टीको उत्तराधिकारी संगठन हो, प्रतिक्रियावादी षड्यन्त्र चिर्ने शक्ति हो,’ उनले भने, ‘पार्टीभित्र र बाहिर जटिल परिस्थिति छ, जुन जनयुद्धको समयमा पनि भोगिएको थियो।’

प्रचण्डले अहिले वर्ग संघर्ष थप पेचिलो बन्दै गएको उल्लेख गर्दै पार्टी एकता र क्रान्तिकारी धारलाई बलियो बनाउनेतर्फ लाग्नुपर्नेमा जोड दिए। ‘महाधिवेशनले सर्वसम्मत निर्वाचित गरेको नेतृत्वको रक्षा तथा संस्थागत गर्नु अहिलेको आवश्यकता हो,’ उनले भने।