बालेनले किन भेटे पूर्वराष्ट्रपति भण्डारी ?

काठमाडौँ । पूर्वराष्ट्रपति विद्यादेवी भण्डारी र काठमाडौं महानगरपालिकाका मेयर बालेन्द्र शाह (बालेन)बीच भेटवार्ता भएको छ। भण्डारीको आग्रहमा मेयर शाह गत बिहीबार (असार १९ गते) उनकै निजी निवास भंगाल पुगेर भेटेका हुन्। स्रोतका अनुसार, भेटवार्ता करिब आधा घण्टा चलेको थियो । 

भेटमा समसामयिक राजनीतिक घटनाक्रम, काठमाडौं महानगरपालिकामा देखिएको आन्तरिक विवाद, र बजेट ल्याउने प्रक्रियामा आइरहेको जटिलता बारे कुराकानी भएको मेयरको सचिवालयले जनाएको छ।

स्रोतका अनुसार, भण्डारीले विशेषगरी महानगरको बजेट प्रक्रिया रोकिएको विषयमा चासो व्यक्त गर्दै कारणबारे सोधपुछ गरेकी थिइन्। जवाफमा मेयर शाहले प्रमुख प्रशासकीय अधिकृतको विवादबारे जानकारी गराउँदै सोही कारण बजेट आउन नसकेको जानकारी गराएका थिए।

भेटवार्ताका क्रममा नेकपा एमालेका केही सक्रिय नेताहरु समेत सहभागी रहेको जनाइएको छ । 

पूर्वराष्ट्रपति भण्डारीले केही समयअघिबाट मात्रै एमालेमा सक्रिय राजनीति फर्किएको घोषणा गरेकी थिइन् । उनले पूर्वराष्ट्रपतिको हैसियतमा प्राप्त सेवा–सुविधा पनि त्याग गरिसकेकी छन्। त्यसपश्चात उनको राजनीतिक भेटघाटहरु बढ्दै गएका छन्।

भण्डारी र बालेनबीचको चिनजान पुरानै हो। राष्ट्रपति हुँदा भण्डारीले अघि सारेको ‘चुरे–तराई संरक्षण कार्यक्रम’ अन्तर्गतको एक परियोजनामा बालेन विज्ञका रुपमा संलग्न रहेको पृष्ठभूमिमा यी दुईबीच सम्बन्ध रहँदै आएको बताइएको छ।

यतिबेला एमाले अध्यक्ष तथा प्रधानमन्त्री केपी शर्मा ओलीसँग मेयर शाहबीचको सम्बन्ध चिसिएको चर्चा चलिरहेका बेला, एमालेमै फर्किएकी भण्डारीसँगको भेटले थप राजनीतिक संकेतहरू दिएको एमाले निकटस्थहरु बताउँछन् ।