‘कुलिङ अफ पिरियड’ हेरफेर प्रकरण: छानबिन समितिको पहिलो बैठक आज बस्दै

काठमाडौं । संघीय निजामती सेवा विधेयकमा गरिएको ‘कुलिङ अफ पिरियड’सम्बन्धी हेरफेरको छानबिन गर्न गठित संसदीय विशेष समितिको पहिलो बैठक आज मंगलबार बस्दैछ।

Watch On

बैठक दिउँसो १२ बजे संसद् भवन नयाँ बानेश्वरस्थित शंकर हलमा सभामुख देवराज घिमिरेको उपस्थितिमा सुरु हुने संसद् सचिवालयले जनाएको छ।

राज्य व्यवस्था तथा सुशासन समितिबाट सर्वसम्मत पास भएको विधेयकको प्रतिवेदनमा उल्लेख नभएको ‘बाहेक’ शब्द प्रतिनिधिसभाबाट पारित प्रतिवेदनमा घुसाइएको पाइएपछि विवाद चर्किएको थियो। सोही विषयमा छानबिन गर्न सभामुख घिमिरेको प्रस्तावमा सोमबार सात सदस्यीय विशेष संसदीय समिति गठन गरिएको हो।

कांग्रेस सांसद जीवन परियार संयोजक रहेको समितिमा नेपाली कांग्रेसबाट सुशीला थिङ, नेकपा एमालेबाट ईश्वरी घर्ती र नारायण आचार्य, माओवादी केन्द्रबाट माधव सापकोटा, रास्वपाबाट गणेश पराजुली र राप्रपाबाट रोशन कार्की सदस्य छन्।

समितिलाई २१ दिनभित्र प्रतिवेदन बुझाउने समय दिइएको छ। कार्यादेशअनुसार समितिले विधेयक हेरफेरमा संलग्न पक्ष पहिचान गरी कारबाही सिफारिस गर्नेछ, साथै यस्ता घटना दोहोरिन नदिन सुझाव पनि प्रस्तुत गर्नुपर्नेछ।

यसैबीच, समितिमा हेरफेरको संदेह देखिएको राज्य व्यवस्था तथा सुशासन समितिका सभापति रामहरि खतिवडाले छानबिन प्रतिवेदन नआएसम्म आफू कुनै कामकारबाहीमा संलग्न नहुने बताएका छन्।