काठमाडौं । उपभोक्ता अदालतको निर्णयविरुद्ध नेपाल चिकित्सक संघको आह्वानमा डाक्टरहरू आन्दोलनमा उत्रिएपछि देशभर आकस्मिकबाहेकका स्वास्थ्य सेवा ठप्प भएका छन्।

संघले उपभोक्ता अदालतले चिकित्सकीय अभ्याससम्बन्धी मुद्दामा हस्तक्षेप गरेको भन्दै उक्त आदेशप्रति असहमति जनाउँदै आन्दोलनको घोषणा गरेको हो। संघको नेतृत्वमा चिकित्सकहरू सोमबारदेखि आकस्मिकबाहेक सेवा बन्द गर्दै आन्दोलनमा उत्रिएका हुन्।

आज (मंगलबार) काठमाडौंको माइतीघर मण्डलामा सेतो कोट लगाएका चिकित्सकहरू र्यालीसहित सडकमा उत्रिए। उनीहरूले बिजुली बजारसम्म प्रदर्शन गर्दै उपभोक्ता संरक्षण ऐन संशोधनको माग राखे।

संघले असार १७ गतेदेखि देशभरका चिकित्सकहरूलाई कालोपट्टी बाँधेर सेवा दिन आह्वान गरेको थियो। तर, सोमबारदेखि आन्दोलन थप चर्काउँदै आकस्मिकबाहेक सबै सेवा ठप्प गरिएको हो।

आन्दोलनका कारण स्वास्थ्य संस्थामा आएका सर्वसाधारण बिरामीहरू ठूलो समस्यामा परेका छन्। ओपीडी सेवा बन्द हुँदा टाढाटाढाबाट आएका बिरामी अन्यौलमा परेका छन् भने कतिपय फर्किन बाध्य भएका छन्।

संघको प्रमुख माग उपभोक्ता संरक्षण ऐन २०७५ को दफा २ मा रहेको ‘स्वास्थ्य सेवा’ सम्बन्धी व्यवस्था हटाउनुपर्ने हो। चिकित्सक संघले स्वास्थ्य सेवा उपभोक्ता ऐनअन्तर्गत राख्दा चिकित्सकहरू अपराधी सरह व्यवहारको शिकार हुनुपर्ने अवस्था आउने बताउँदै आएको छ । 

संघका अध्यक्ष डा. अनिल विक्रम कार्कीले नेपाल मेडिकल काउन्सिल ऐन, २०२० बमोजिम चिकित्सकीय अभ्यास नियमन गर्ने एकमात्र अधिकार काउन्सिलको रहेको बताउँदै अदालतले त्यसमा हस्तक्षेप गरेकाले चिकित्सकहरू काममा फर्कन नसकेको बताए।

“राज्यले हाम्रो माग सुन्ने संकेत देखाएको छैन,” डा. कार्कीले भने, “यही अवस्था रह्यो भने हामी आफ्ना लाइसेन्ससमेत सम्बन्धित निकायमा बुझाउन तयार छौँ।”

संघले स्वास्थ्य क्षेत्रलाई सेवा नभई ‘उद्योग’ बनाउने प्रयास भइरहेको आरोपसमेत लगाएको छ।