राप्रपामा रडाको : आफै पार्टी छोडेको घोषणा गरेका नवराज सुवेदी पार्टीमा भुमिका खोज्दै निर्वाचन आयोग पुगे

काठमाडौँ । राष्ट्रिय प्रजातन्त्र पार्टी (राप्रपा)भित्र अनुशासन समितिको नेतृत्व हेरफेरसँगै चर्कीएको विवाद निर्वाचन आयोगसम्म पुगेको छ। गत चैत ४ गते पार्टीको साधारण सदस्य समेत नरहेको घोषणा गर्दै नवराज सुवेदीले पार्टी छोडेपछि अनुशासन समितिको संयोजक पद पनि खाली भएको थियो । उक्त पदमा पार्टी अध्यक्ष राजेन्द्र लिङ्देनले रोशन कार्कीलाई नियुक्त गरेपछि असन्तुष्ट बनेका सुवेदी नेतृत्वको इतर समूहले निर्वाचन आयोगमा उजुरी दिएको हो।

Watch On

पूर्वअध्यक्ष डा. प्रकाशचन्द्र लोहनी, महामन्त्री धवलशमशेर राणा लगायत नेताहरूको नवराज सुवेदी सहित उजुरी बोकेर  आइतबार आयोगमा पुगेका हुन् । उनीहरूले अध्यक्ष लिङ्देनको पछिल्लो निर्णयहरूलाई ूविधानविपरीत र स्वेच्छाचारीू ठहर भएको दाबी गरेका छन् । 

संस्थापन पक्षले भने सुवेदीले स्वेच्छाले पार्टी परित्याग गरिसकेकाले उनलाई हटाउनु स्वाभाविक भएको दाबी गरेको छ। प्रवक्ता मोहन श्रेष्ठका अनुसार सुवेदीले चैत ४ गते सार्वजनिक रूपमा राप्रपा छाडेको घोषणासहितको भिडिओ समेत सार्वजनिक गरिसकेकाले पार्टीले छुट्टै राजीनामा माग्ने अवस्था नरहेको हो।

तर सुवेदीले आफूलाई कुनै प्रक्रिया नपुर्याई हटाइएको भन्दै आपत्ति जनाउँदै आएका छन्। उनले फेरि राप्रपामै सक्रिय हुन चाहेको संकेत दिए पनि संस्थापन पक्ष त्यसप्रति सकारात्मक देखिएको छैन।

पार्टीभित्र गहिरिँदै गएको विवादले महाधिवेशन अघि नेताबीचको दूरी बढाएको देखिएको छ। अबको दिनमा विवाद थप चर्किने संकेत देखिन थालेको छ।