काठमाडौँ । अदालतको फैसला कार्यन्वयन गर्न घुस मागेको अडियो सार्वजनिक भएपछि पदच्यूद भएका तत्कालिन सामान्य प्रशासनमन्त्री राजकुमार गुप्ता र उनलाई घुस दिन बिचौलियाको भुमिका निर्वाह गर्ने पूर्व भुमिसुधार मन्त्री रञ्जिता श्रेष्ठको अख्तियारमा बयान भएको छ । 

मन्त्री क्वाटरमै घुस लेनदेन भएको सुनिने अडियो सिधाकुराले  असार २७ गते सार्वजनिक गरेको थियो । 

अडियोमा पोखराको बाटुलेचौरमा रहेको लिची बैगैँचाको १३५ रोपनी निजी जग्गा अदालतको आदेशअनुसार दुुर्गादेवी शाहको परिवारका सदस्यका नाममा दर्ता कायम गर्ने प्रयोजनका लागि ५३ लाख रुपैयाँ घुसको डील भएको थियो ।

यस्तै,कास्की जिल्लाको भूमी आयोगको अध्यक्ष नियुक्त गर्न पनि २५ लाख रुपैयाँ डिल भएको अडियोमा उल्लेख थियो । जग्गामा हक कायम हुनुपर्ने शाहका नातीका मित साइनो पर्ने एक व्यक्तिसँग रञ्जिता श्रेष्ठमार्फत  मन्त्री गुप्ताले घुसको डिल गरेका थिए । 

सिधाकुराले प्रसारण गरेको अडियो सुरुमा आफ्नो भएको स्वीकार गरेका निवर्तमान मन्त्री गुप्ताले त्यसपछि भने सार्वजनिक रुपमा आफ्नो अडियो होइन भनी जिकिर गर्दै आएका थिए । तर, अडियो सार्वजनिक भएसंगै चौतर्फी आलोचना भएपछि उनले ३१ असारमा मन्त्रीपदबाट राजिनामा दिए ।

असार १० मै अडियोसहित उजुरी परे पनि अख्तियार अनुुसन्धानमा हच्किएको थियो । तर,संसद देखि सडकसम्म आलोचना पछि मन्त्री गुप्ताको राजिनामा आयो र अडियोमा जोडिएका सबैमाथि विस्तृत अनुुसन्धान सुुरु भएको हो ।  

घुस काण्डको पृष्ठभूमी 

हाल अरु नै व्यक्तिको भोग चलन गरिरहेको कास्कीको पोखरास्थित बाटुुलेचौरको जग्गा अदालतको आदेशबाट स्थानीय दुर्गादेवी शाहको परिवारका सदस्यको नाममा हक कायम हुनुुपर्ने थियो ।
तत्कालिन जिल्ला अदालतबाट शाहको नाममा लैजान भएको फैसला उपर २०३९ सालमा पुुनरावेदन भए पनि फैसला शाहकै पक्षमा भएको थियो । तर, शाहको मृत्यु भइसकेका कारण उनको तेस्रो पुस्ताको रुपमा रहेका नातीहरु सुरज र भिमसेन शाह जग्गाका हकदार थिए । पटक पटक ताकेता गर्दा पनि जिल्ला मालपोत र नापी कार्यालयले अदालतले आदेश अनुसार हकदारको नाममा जग्गा नामसारी गर्न मानिरहेका थिएन । 
केही गर्दा पनि जग्गा आफ्नो नभएपछि नातामा मित पर्ने एक व्यवसायीलाई समातेर शाह परिवारले राजनीतिक पावर लगाएर जग्गा नामसारी गर्न प्रयास गरेको थियो । तर,यसैका लागि मन्त्री गुुप्ताले अनुकुलका कर्मचारी पठाउने विषयमा घुसको डिल गरेका थिए । 

यसरी भइरहेको छ अख्तियारको बिस्तृत अनुुसन्धान ?

असार १० मा परेको उजुरीका आधारमा अख्तियारले प्रकरणमा जोडिएका सबैलाई पालै पालो बोलाएर भ्वाइस टेस्ट र बयान गरिरहेको छ । स्रोतकाअनुसार एक साता अघि नै घुुस रेकर्डमा संलग्न स्रोतसँग सबै प्रमाण अख्तियारले रेकर्ड गराएको छ । 

सोही आधारमा मंगलबार घुस प्रकरणपछि राजिनामा दिएका निवर्तमान सामान्य प्रशासनमन्त्री राजकुमार गुप्ताको भ्वाइस टेष्ट गराएको छ भने बयान समेत लिएको छ । बयानका लागि गुप्ताले अख्तियारमा झण्डै २ घण्टा बिताएको अख्तियार स्रोतले बतायो । 

यस्तै,घुस प्रकरणमा बिचौलियाको भूमिका निभाएकी नागरिक उन्मुक्ति पार्टीकी अध्यक्ष एवम् पूर्वभूमीसुधार मन्त्री रञ्जिता श्रेष्ठसँग पनि बुधबार बयान लिएको छ । रञ्जितासँग सार्वजनिक भएको अडियो र घटनासंग सम्बिन्धित रहेर बयान र भ्वोइस टेष्ट गरिएको अख्तियारले जनाएको छ ।

अख्तियारकाअनुसार यो प्रकरणमा जोडिएका कर्मचारी, अन्य व्यक्ति र सबै मानिसलाई पत्राचार गरेर दिन नै तोकेर बयानका लागि बोलाइएको छ । साथै अख्तियारको आफ्नै संयन्त्रमार्फत घुस प्रकरणको अडियोको फरेन्सिक जाँज गरिएको छ भने प्रहरीको विधिविज्ञान प्रयोगशालामा पनि परिक्षण गराई सकिएको छ ।

मन्त्रीले पोलेका अर्का मन्त्रीमाथि के हुुन्छ ?

घुस प्रकरणको अडियोमा बहालवाला सामान्य प्रशासन मन्त्री राजकुमार गुुप्ताले सोही प्रकरणमा भूमी सुधार मन्त्री बलराम अधिकारीलाई पनि पोलेका थिए । 
सार्वजनिक भएको अडियोमा बलरामले पैसा खाइसकेको मन्त्री गुप्ताले भनेका छन् । तर, बलराम अधिकारीमाथि कुुनै अनुसन्धान भएको छैन् । जब की मन्त्री अधिकारीले पत्रकार सम्मेलनमा आफूले घुस दिन आउने मानिसलाई मन्त्रालयमा भेटेको स्वीकार गरेका थिए । 

तर, भूमी सुधार मन्त्री बलराम अधिकारी फेरी पनि आफूले घुस नलिएको दाबी गर्न भने छोड्दैनन । अचम्मको कुरा त के छ भने घुस दिएको अर्का मन्त्रीले राजिनामा दिएर अनुसन्धानमा तानिदाँ र घुुस दिनेले दिएको बताईरहँदा पनि भूमी सुधारमन्त्रीले नैतिकता देखाएका छैनन् । अझ उल्टै संसदको रोष्टमबाटै जुन औलामा विष लाग्यो तेही औँला झर्ने भन्दै लाज पचाइरहेका छन् । 

स्रोतका अनुसार अख्तियार लिएको बयानमा यो घटनासँग जोडिएका व्यक्तीहरुले भूमी सुधार मन्त्री अधिकारीसँग भएका घटनाका समेत विवरण टिपाएका छन् । साथै उनीसँग सम्बन्धीत थप प्रमाण अख्तियारलाई बुझाएका छन् । 

तर, अख्तियारले बलराम अधिकारीमाथि छानबिन गर्ने आँट गर्छकी गर्दैन भन्नेमा जग्गा विवादमा जोडिएका अन्य व्यक्तीहरुनै शंसकित छन् । किनकी उनी प्रधानमन्त्री केपी शर्मा ओलीकै क्याबिनेटका मन्त्री हुन्, जसलाई प्रधानमन्त्री ओलीले जोगाइरहका छन् ।

अहिले बाहिरिएकै विवरणले मात्रै पनि अख्तियारले बयान गराउन सक्ने अवस्था भएपनि मन्त्रीकै रुपमा अख्तियारमा बयानका लागि बोलाउने की नबोलाउने भन्नेमा छलफल भैरहेको जनाइएको छ । 

घुसको डिल गरको अडियो सार्वजनिक भएपछि राजिनामा गरेर बयानका लागि अख्तियारको कठघरमा पुगेका निवर्तमान मन्त्री राजकुमार गुप्ताले नै बहालवाला अर्का मन्त्री अधिकारीका बारेमा धेरै कुरा खुलाएका छन् । 
अब आरोप लागेको एउटा मन्त्री अख्यितारका कठघरामा, घटनामा जोडिएकी पूर्वमन्त्री पनि अनुसन्धानको घेरामा पर्दा त्यही समुहले पैसा खाएको, भेटेको भनेका अर्का वहाला मन्त्री भने मन्त्रीको झण्डा हल्लाउँदै सिंहदरबार र बालुवाटार गर्नुले सुशासनको धज्जी उडाएको छ ।

सिधाकुराले गरेको यसअघिका खुलासाः

सामान्य प्रशासनमा घुसको रेटः मन्त्री ७८ लाख, सचिवालय माग्थ्यो ७ देखि १० लाख, के गर्ला अख्तियार ?

मन्त्री राजकुमारलाई घुस दिने विचौलीया पूर्वमन्त्री तथा नाउपाकी अध्यक्ष रञ्जिता श्रेष्ठ

सामान्य प्रशासन मन्त्री राजकुमार गुप्तालाई घुसका रुपमा दुई झोला रकम, अख्तियारमा नोट नम्बर र फोटो सहित उजुरी