काठमाडौँ । बाटोमा सेतो टिसर्ट लगाएका व्यक्ति सडकमा हिँडिरहेका छन् । उनको पछिबाट हाइलक्स जस्तो देखिने सेतो गाडी आउँछ । त्यो गाडी तिनै सेतो टीसर्ट लगाउने मान्छेको छेउमा रोकिन्छ । उनीबिच त्यहाँ केही विवाद भएजस्तो देखिन्छ । 

त्यत्तिकैमा गाडीको स्टेरिङमा बसेका व्यक्तिले ति व्यक्तिलाई झापड हन्छन् । त्यसपछि गाडीबाट अन्य व्यक्तिहरु पनि झर्छन् । उनलाई उनीहरुले पनि मुक्का प्रहार गर्छन् । त्यहाँ एकजना सेतो धर्के कालो टिसर्ट लगाएका व्यक्तिले उनीहरुलाई मिलाउन खोजेको जस्तो देखिन्छ । केहीबेपछि ति व्यक्तिहरु गाडी चढेर अघि बढ्छन् । 

यो दृश्य कैद हुँदा सिसिटिभीले अगस्ट १८ २०२५ अर्थात भदौ २ गते सोमबार बिहान करिब पौने ३ बजेतिरको भएको देखिन्छ । 

त्यस्तै अर्को दृश्यमा केही मानिसहरु कसैलाई कुरेर बसेजस्तो देखिन्छ । सोही क्रममा एउटा प्रहरीको भ्यान पनि उनीहरुको अगाडीबाट जान्छ । 

जब भ्यान केही पर पुग्छ घरको भित्र भएका एक जना मान्छेलाई निर्घात कुट्नपिट सुरु हुन्छ । त्यसपछि उनीहरुले ति व्यक्तिलाई बाहिर रोडमै तानेर पालैपालो कुट्न थाल्छन् । 

यो दृश्य पनि ठमेलको नर्सिङ चोककै हो ।

सोही दिन सोही समयकै आसपासको घटना हो । अर्थात भदौ २ गते सोमबार बिहान पौने ३ बजे आसपासकै घटना हो । 

यो दुबै दृश्यमा कुटाई खाने व्यक्ति पनि एकै हुन् । र दुबै दृश्यमा कुट्ने व्यक्तिहरु पनि एकै हुन् । भिडियोमा कुटाइ खाने व्यक्ति हुन् बाजुराको बुढीनन्दा नगरपालिका वडा नम्बर ५ कोल्टी घर भएका हिम शिखर मल्ल । मल्ल अहिले ठमेलको नरसिंह चोकमा व्यवसाय गर्दै आएका छन् । नरसिंह चोकमा रेष्टुरेन्ट एण्ड बार सञ्चालन गर्दै आएका मल्ल आफूमाथि बिना कसूर कुटपिट भएको बताउँछन् । 

मल्लका अनुसार उनले ठमेलमा बार चलाएको केही मानिसहरुलाई मन परेको छैन । त्यो व्यवसायबाट भएको कमाईमा केही मानिसहरुले हिस्सा खोजिरहेका छन् । सोही कारण आफूमाथि कुटपिट भएको उनी बताउँछन् । 
मल्लको दाबीअनुसार उनलाई कुटपिट गर्ने व्यक्तिहरु नविन लामा, भिलेन भनिने प्रल्हाद सुनार, दावा लामा र उनीहरु समूहका व्यक्तिहरु हुन् । 

पीडित मल्लले आफूलाई कुटपिट गर्नेविरुद्ध प्रहरीमा उजुरी दिएका छन् । कुटपिट लगायतका घटनाबारे उजुरीहरु आइरहेको र त्यमाथि छनबिन भइरहने भए पनि यही घटनासँग सम्बन्धित उजुरी आए नआएको प्रष्ट नभएको प्रहरी प्रभाग लैनचौरका प्रमुख डिएसपी जागेश्वर भण्डारीले बताए । आफू दिनभर फिल्डको डिउटीमा रहेको भन्दै उनले कार्यालयमा गएर बुझ्ने र थप कारबाही अघि बढाउने सिधाकुरालाई बताए ।
 
केही समय अघि मात्रै गुण्डागर्दी बढेको भन्दै काठमाडौँ प्रहरीले केही समूहलाई पक्राउ गरेर मुद्दा चलाएको थियो । तर, फेरि व्यस्त राजधानी सहरकै बीचमा व्यवसायी कुटिएको भिडियो बाहिरिएको छ ।