कटारीमा अनुदानको मल प्रकरणः छानविन समितिले प्रतिवेदन बुझायो, तर खुलेन दुई सय बोरा मलको स्रोत

उदयपुर । उदयपुरको कटारी नगरपालिकामा किसानलाई वितरण गर्न  दिएको अनुदानको मल व्यापारीको गोदाममा दुई सय बोरा युरिया मल फेला परेपछि  गठन भएको छानविन समितिले जिल्ला प्रशासन कार्यालयमा प्रतिवेदन बुझाएको छ । 

भदौ १२ गते उदयपुरका सहायक जिल्ला अधिकारी विक्रम पाण्डेयको नेतृत्वमा कटारीमा गरेको अनुगमन टोलीले गोदाममा लुकाएर रोखेको अवस्थामा अनुदानमा आएको  युरिया मल फेला पारेको थियो । 

कटारी ४ मा दिलीप चौधरीले सञ्चालन गर्दै आएको अशुतोष ट्रेडर्स तथा जेनरल स्टोर र जय माँ काली प्रालिबाट युरिया मल फेला परेपछि आवश्यक छानविनका लागि समिति गठन गरेको थियो । कटारी नगरपालिका, ईलाका प्रशासन कार्यालय ,राष्ट्रिय अनुसंधान प्रतिनिधि, पत्रकार महासंघ प्रतिनिधि, उधोग बाणिज्य संघ र स्थानीय संघसस्थाका प्रतिनिधिसमेत रहनेगरी छानविन समिति बनाएर अध्ययन सुरु गरेको थियो । कटारीका प्रमुख प्रशासकीय अधिकृत राजन थापाले मल कहाँबाट र कसरी गोदाममा आयो भन्ने विषय अझै खुल्न सकेको छैन् । छानबिन समितिले प्रतिवेदन तयार पारी जिल्ला प्रशासन कार्यालय पठाएको बताए । 

नगरपालिकासँग कारबाही गर्ने अधिकार नभएकाले उक्त विषयमा जिल्ला प्रशासनले थप अध्ययन गरेर कारबाहीको प्रक्रिया अघि बढाउने प्रशासकीय अधिकृत थापाले बताए । 

उदयपुरका प्रमुख जिल्ला अधिकारी प्रेम लुईटेलका अनुसार मल भेटिएको गोदाममा सञ्चालक चौधरीले युरिया मलको स्रोत नबताएकाले थप छानविन गर्ने बताए । सरकारी अनुदानको मल व्यापारीको फेला पर्दा कुन कानुन आकर्षित हुन्छ भन्ने कुनै कानूनी आधार नभएकाले अहिले पनि हामि  छलफल गरिरहेका छौं। प्रजिअ लुइटेलका अनुसार मल कहाँबाट आयो र कसरी ल्यायो भन्ने विषयमा कुनै कागजात फेला परेको छैन् । 

उक्त विषयमा थप छलफल गरी निर्णय गर्ने र कुन कानुन आकर्षण हुन्छ त्यही अनुसार कारबाहीको प्रक्रिया अगाडि बढाउने लुईटेलले जानकारी दिए । व्यापारीलाई जस्तो कारबाही भएपनि उक्त मल भने नगरपालिकामार्फत किसानलाई नै वितरण गर्ने उनले बताए । व्यापारीको गोदाममा फेला परेको उक्त मल नगरपालिकाले आवश्यकताका आधारमा मापदण्ड बनाएर नगरबासीलाई वितरण गर्ने तयारी गरेको नगर प्रमुख राजेशचन्द्र श्रेष्ठले  जानकारी दिए।

सम्बन्धित समाचार:

कटारीमा व्यापारीको गोदाममा २ सय बोरा अनुदानको मल फेला