काठमाडौँबाट दिल्ली पुर्‍याएर मृगौला तस्करी, बेच्नेलाई १० लाख, एजेन्टलाई ५० हजारको प्रलोभन

काठमाडौँ । आकर्षक रकम पाइने प्रलोभन दिदै सोझा नेपालीहरुलाई भारत पु¥याएर मृगौला झिक्ने समूह प्रहरीको फन्दामा परेको छ । सिन्धुलीका एक मानिसको मृगौला झिकिएको घटनामाथि बिस्तृत अनुसन्धान गरेको नेपाल प्रहरीको मानव बेचबिखान ब्यूरोले यो प्रकरणमा थप गिरोह पहिचान गरेको हो । 

Watch On

ब्यूरोले काठमाडौँका वरपरका जिल्लाका गरिब मानिसहरुलाई फकाएर भारतको राजधानी नयाँ दिल्ली पुर्याएर मृगौला झिक्न सक्रिय गिरोहका नाइके र उनका सहयोगीलाई पक्राउ गरेर थप अनुसन्धान अघि बढाएको जनाएको छ । 

ब्यूरोका प्रवक्ता प्रहरी उपरिक्षक नरेन्द्र कुवँरकाअनुसार तस्करको गिरोहले नेपालबाट भारत पुर्याइने मानिसहरुलाई मृगौला दिंदा स्वास्थ्यामा कुुनै असर नपर्ने र झण्डै १० लाख नेपाली रुपैयाँ पाइने प्रलोभनमा पार्ने गर्थे । 

जब उनीहरुको मृगौला झिकिन्थ्यो त्यसपछि चार पाँच हजार रुपैयाँ खल्तिमा हालेर नेपाल पठाइने गरेको अनुसन्धानमा फेला परेको छ ।

ब्यूरोकाअनुसार मृगौला बेच्न गाउँगाउँमा मान्छे खोज्ने दलालले ५० हजार रुपैयाँ कमिसन लिन्थे । मृगौला दिने मानिसलाई ६ लाख भारु झण्डै नेपाली ९ लाख ५० हजार हाराहारी दिइने प्रालोभनमा पारिन्थ्यो ।

काठ क्षेत्रका ५ जिल्ला धादिङ, नुवाकोट, सिन्धुपाल्चोक, काभ्रे र सिन्धुलीका मानिसहरु तस्करको निसानामा पर्ने गरेका प्रारम्भिक अनुसन्धानमा खुलेको छ । ब्यूरोले सो अपराध बिरुद्ध ‘अप्रेसन लाइफ सिल्ड’ नाम दिएर  कारबाही चलाएको थियो । सो क्रममा गिरोहका नेपाल कनेक्सनका नाइके र उनका सहयोगीलाई नियन्त्रणमा लिएर थप अनुसन्धान गरिरहेको ब्यूरोले जनाएको छ । 

यसरी पक्राउ परेकामा सिन्धुपाल्चोकका श्यामकृष्ण भण्डारी र सुजन भारती रहेका छन् । यो समूहले मात्रै ५ जना नेपालीलाई भारत पुर्याएर मृगौला झिकेर बेच्ने गरेको अनुसन्धानका क्रममा खुलेको छ ।

ब्यूरोका अनुसार सिन्धुुपाल्चोकको सुनकोसी गाउँपालिका ७ का भण्डारी समूहका नाइके हुन भने सिन्धुपाल्चोककै इन्द्रावती नगरपालिका २ का सुजन भारती उनका सहयोगी हुन् । उनीहरुलाई भारतबाट नेपाल आउने क्रममा विभिन्न नाकाबाट पक्राउ गरिएको प्रहरीको दाबी छ । ब्यूरोकाअनुसार यो  समूहले मृगौला झिकेको भन्दै ४ वटा जाहेरी दर्ता भएका छन्  । ति जाहेरीमा ५ जना पीडितहरू छन् । 

प्रारम्भिक अनुसन्धानका क्रममा किड्नी दिन तयार हुने मानिसलाई काठमाडौँ ल्याएर गाडी चढाएर नयाँ दिल्लीसम्म पुर्याउने, त्यहाँ एक होटलमा राख्ने र बेहोस बनाउने औषधी खुवाएर पहिचान नहुने ठाउँमा लगेर मृगौला झिकिने गरेको पाइएको छ । यो प्रकणमा यस अघि पक्राउ परेका दुई जनाको बयानका आधारमा थप गिरोहका सदस्य पक्राउ गरिएको प्रहरीको भनाई छ ।     

प्रहरीसँग मुख्य नाइके भण्डारीले नेपालबाट लगिएका मानिसहरूलाई दिल्लीको लाजपत नगरस्थित कस्तुरवा निकेतनको एक होटलमा लगेर राखिन्थ्यो । मृगौला दिन तयार भएर पुर्याएका मानिसलाई होटलमै स्वास्थ्यकर्मी बोलाएर रगत परिक्षण गर्ने गरेको बयान दिएका छन् । 

उनले ति नेपालीहरूलाई बेहोस बनाएर आँखामा पट्टि लगाएर अस्पतालमा ३४ दिन राख्ने र नेपाल फर्काउने गरेको स्वीकारेका छन् । प्रहरीसँगको बयानमा भण्डारीले २५ जना व्यक्तिको मृगौला झिकेको स्वीकार गरेका छन् । यसरी झिकीएका मध्ये एक जनाबापत ६लाख भारु आफूले लिने गरेको र मृगौला बिक्री गर्ने खोज्ने दलाललाई ५० हजार रुपैयाँ नेपाली कमिसन तोकेको पनि स्वीकारेका छन् ।  

उनीसँगै पक्राउ परेका सुजन भारतीले नेपालमा मान्छे खोज्ने र भारत पुर्याउन सहयोग गर्ने गरेको स्वीकार गरेका छन् । त्यसबापत आफूले प्रति व्यक्ति ४० हजार रुपैयाँ कमिसन पाउने गरेको उनले प्रहरीलाई बयान दिएका छन् । पक्राउ परेकाहरुले २५ हाराहारीको मृगौला बिक्री गरेको दाबी गरेपछि अनुुसन्धानमा एक सय भन्दा धेरै मानिस पीडित भएको हुनसक्ने देखिएको  प्रहरीको भनाई छ ।