शुशिला कार्कीलाई प्रधानमन्त्री नियुक्त गर्ने अन्तिम तयारी, 'राजा फर्किने' हल्ला मात्रै भएको दाबी

काठमाडौँ । मुलुकलाई निकास दिने विषयमा राष्ट्रपति रामचन्द्र पौडेल, प्रधानसेनापति अशोकराज सिग्देल, पूर्वप्रधानन्यायाधिश शुशिला कार्की अहिले छलफलमा रहेको जनाइएको छ । 

Watch On

जेनजी समूहका तर्फबाट नेतृत्व गरिरहेका  हामी नेपालीका सुदन  गुरुङले  केहिबेर अघिको छलफलमा सहभागी भएका अधिवक्ता ओमप्रकाश अर्यालसँग भएको संवाद सार्वजनिक गरेका छन्  । 

सार्वजनिक गरेको एक भिडियोमा संसद् विघटनको बटमलाइन राखेर प्रधानमन्त्रीमा शुशिला कार्कीलाई नियुक्त गर्ने गरी छलफल भइरहेको जानकारी गराइएको छ । 

अहिले राष्ट्रपति पौडेल,प्रधानसेनापति सिग्देल र पूर्वप्रधानन्यायाधिश कार्कीबिच छलफल भइरहेको बताइएको छ । साथै राजा फर्किन लागेको हल्ला मात्रै भएको अर्याल भनेको भिडियोमा सुनिन्छ ।

यस विषयमा अन्य स्रोतले पनि पुष्टि गरेका छन् । कार्कीलाई प्रधानमन्त्री बनाउने विषय रातभरमा कुनै घटना नभए लगभग निष्कर्षमा पुगेको छ । 

स्रोतका अनुसार केही प्राविधिक कुरा टुङ्ग्याएर शुक्रवार बिहान शुशिला कार्कीलाई शपथ गराउने तयारी भइरहेको छ । 

भ्रष्टाचारविरुद्ध भदौ २४ र २५ गते प्रदर्शन गरेको जेनजी समूहले प्रधानमन्त्रीकारुपमा कार्कीको नाम प्रस्ताव गरेको थियो । 

जेनजीको प्रदर्शनमा सरकारले दमन गर्दा २४ गते नै १९ जनाको मृत्यु भएको थियो दोस्रो दिनको प्रदर्शनमा पनि केहीको मृत्यु भएको थियो । प्रदर्शनमा मृत्यु हुनेको सख्ंया अहिलेसम्म ३६ पुगेको छ । 

प्रदर्शन चर्किएपछि बुधवार मध्यान्हमा प्रधानमन्त्री केपी शर्मा ओलीले राजीनामा दिएर नेपाली सेनाको हेलिकप्टरमा बालुवाटारबाट उडेका थिए । 

प्रदर्शनकारीहरूले भने संसद् भवन, सिंहदरबार, राष्ट्रपति भवन, बालुवाटारस्थित प्रधानमन्त्रीको सरकारी निवासमा आगजनी तथा तोडफोड गरेका थिए ।