काठमाडौँ । नेपाल समाजवादी पार्टी (नेसपा नयाँ शक्ति)का अध्यक्ष एवम् पूर्वप्रधानमन्त्री बाबुराम भट्टराईले सुशीला कार्कीलाई अन्तरिम सरकार प्रमुखका रूपमा सिफारिस गरिनुलाई सकारात्मक भनेका छन्। उनले पूर्वप्रधानन्यायाधीश कार्कीको छवि स्वच्छ र सक्षम भएकाले उनलाई अन्तरिम सरकार प्रमुखका रूपमा आफू र आफ्नो दलबाट पूर्ण समर्थन रहने बताएका हुन्। 

शुक्रबार विज्ञप्ती जारी गर्दै भट्टराईले कार्कीलाई वर्तमान संविधानको जगमा टेकेर राष्ट्रपति रामचन्द्र पौडेलेल यथाशीघ्र शपथ गराउन माग गरेका छन् । भट्टराईले भनेका छन्, 'अब उहाँलाई वर्तमान संविधानको जगमा टेकेर संविधानका पालनकर्ता र संरक्षक रामष्ट्रपतिले विधिवत् शपथ ग्रहण गराएर अहिलेको अन्योल र आशंका छिटो भन्दा छिटो अन्त्य गरिनु पर्छ,' उनले भनेका छन्।

त्यसको उपयुक्त संविधानसम्मत र लोकतान्त्रिक विधि के हुनसक्छ भनेर संविधानविद् र जानकारहरूको सल्लाहमा निर्णय गर्नु उपयुक्त हुने पनि उनले बताएका छन्। भट्टराईले ०६९ मा खिलराज रेग्मीलाई मन्त्रिपरिषदको अध्यक्ष नियुक्त गरिएको नजीर र अहिलेको अवस्था फरक रहेको पनि प्रष्ट पारेका छन्। 

त्यतिबेला अन्तरिम संविधान २०६३ मा'राजनीतिक सहमतिका आधारमाु कतिपय निर्णय गर्न सकिने' लेखिएको बताए। 

'तर यो निर्वाचित संविधानसभाले बनाएको स्थायी संविधान हो र यसमा त्यस्तो कुनै प्रावधान छैन । यसबारे जेनजी ले धेरै संवेदनशील भएर सोच्नुपर्छ । अहिलेको आन्दोलनभन्दा पनि ठूलो वलिदानीपूर्ण आन्दोलनको बलमा संविधानसभाबाट बनेको नेपाली इतिहासको पहिलो संविधान हुनाले यसको जगमा टेकेर नै अघि बढ्नु जेनजीको दीर्घकालीन हितमा हुनेछ,' भट्टराईले भनेका छन्।