रास्वपा केन्द्रीय समिति निर्णयः कात्तिकमा विस्तारित बैठक, डा.वाग्लेको नेतृत्वमा वाचापत्र लेखन समिति

काठमाडौँ । २ दिनसम्म चलेको राष्ट्रिय स्वतन्त्र पार्टी९रास्वपा०को केन्द्रीय समिति बैठक ७ वटा निर्णय गर्दै सकिएको छ । रास्वपाका प्रवक्ता मनिष झाका अनुसार आगामी कात्तिक १४ र १५ गते केन्द्रीय विस्तारित बैठक बोलाउने निर्णय गरेको छ । 
साथै फागुन २१ गते हुने निर्वाचनका लागि उपसभापति डा.स्वर्णीम वाग्लेको संयोजकत्वमा ७ सदस्यीय वाचापत्र लेखन समिति पनि गठन गरेको छ । 
यस्ता छन् रास्वपाको केन्द्रीय समितिले गरेका निर्णयः

Watch On

१. राष्ट्रिय स्वतन्त्र पार्टीको केन्द्रीय विस्तारित बैठक आगामी कात्तिक १४ र १५ गते गर्ने । उक्त विस्तारित बैठकमा पार्टीको प्रथम राष्ट्रिय महाधिवेशनका विषयमा समेत छलफल गर्ने । 
२. भदौ २४ गते नख्खु कारागार लगायत अन्य केही स्थानहरुमा भएका घटनाहरुमा पार्टी सदस्यहरुको सम्भावित संलग्नता भएको नभएको सम्बन्धमा सत्यतथ्य पत्ता लगाउन छानबिन समिति गठन गर्ने ।
३. भदौ २३ र २४ गते भएको आन्दोलनमा राज्य पक्षबाट भएको दमन र हिंसाको छानबिन प्रतिवेदन नआएसम्म तत्कालीन सरकारका प्रधानमन्त्री, गृहमन्त्री र सञ्चार मन्त्रीलाई  राजनीतिक क्रियाकलापमा सहभागी हुन बन्देज लगाउन नेपाल सरकारलाई ध्यानाकर्षण गराउने । 
४. वि सं २०४६ सालदेखिको उच्च सार्वजनिक ओहदामा रहेका व्यक्तिहरुको सम्पत्ति छानबिन गर्न  सरकारलाई दबाब दिने ।
५. जेनजी आन्दोलनका क्रममा नेताहरुको निवासमा भेटिएका अवैध नगद साथै चलअचल सम्पत्ति सम्बन्धी सत्यतथ्य छानबिन गर्न नेपाल सरकारको ध्यानाकर्षण गराउने ।
६. जेनजी उमेर समूहका युवाहरु लगायत नयाँ शक्तिहरु, अभियन्ताहरुसँग आवश्यक संवाद एवं सहकार्यका लागि पार्टी केन्द्रीय सदस्य श्री पुकार बमको संयोजकत्वमा ५ सदस्यीय कार्यदल गठन गर्ने ।
७. फागुन २१ गते हुनगइरहेको निर्वाचनका लागि रास्वपाको वाचापत्र तयार गर्न पार्टी उपसभापति डा. स्वर्णिम वाग्लेको संयोजकत्वमा ७ सदस्यीय वाचापत्र लेखन समिति गठन गर्ने ।