जेन–जी आन्दोलमा सहभागीहरुविरुद्ध तत्काल कारवाही प्रक्रिया अघि नबढ्ने

काठमाडौँ । पछिल्लो समय जेन–जी आन्दोलनमा अनावश्यक धरपकड गरी नरसंहार मच्चाउन आदेश दिनेहरुलाई कारवाही गर्नुपर्ने माग चर्को रुपमा उठिरहेको छ । आन्दोलनमा सहभागी भएका केही प्रदर्शनकारीहरु पक्राउ पर्न थालेपछि गृहमन्त्रीको समेत आलोचना बढ्न थालेको  छ । 

Watch On

यही समयमा गृह मन्त्रालयले जारी गरेको सूचनाले जेन–जी प्रदर्शनमा सहभागीहरुमाथि तत्काल कारवाही प्रक्रिया अघि नबढाइने बताएको छ । जेन–जी आन्दोलनबारे छानबिन गर्न बनेको आयोगको क्षत्राधिकारभित्र पर्ने विषयमा तत्काल कारवाही अघि नबढाउने भएको हो । गृहले सूचना जारी गर्दै आयोगको कार्यक्षेत्रमा पर्ने विषयमा सरकारका नियमित संयन्त्रबाट तत्काल कारवाही अघि नबढाइने बताएको हो । 

गृहले जारी गरेको सूचनामा भनिएको छ, ‘आयोगलाई भौतिक एवं मानवीय क्षतिसँग सम्बन्धित सूचना वा जिवेदन ग्रहण गरी विश्लेषण गर्ने र कारवाहीको सम्बन्धमा आवश्यक राय दिने समेतको कार्यादेश रहेको हुँदा आयोगबाट सो कार्यादेश बमोजिम राय सहितको प्रतिवेदन प्राप्त भएपश्चात नेपाल सरकारले कानुन बमोजिम गर्ने व्यहोरा जानकारी गराइन्छ । तसर्थ आयोगको कार्यक्षेत्रमा रहने विषयमा सरकारका नियमित संयन्त्रबाट तत्काल कारवाही अगाडि नबढाइने तर गैर कानुनी रुपमा भएका र हुने गतिविधिमा कानुन अनुसार कारवाही हुने व्यहोरा समेत सबैमा जानकारी गराइन्छ ।’ 

सरकारले जेन–जी आन्दोलनबारे छानबिन गर्न पूर्व न्यायाधीश गौरीबहादुर कार्कीको नेतृत्वमा छानबिन आयोग बनाएको छ । उक्त आयोगले असोज ९ गतेदेखि कार्यप्रारम्भ गरिसकेको छ । आयोगले प्रतिवेदन बुझाएपछि नेपाल सरकारले कानुन बमोजिम गर्ने बताएको छ । त्यस्तै सूचनाको अन्तमा गैर कानुनी रुपमा भएका गतिबिधिमा कानुन अनुसार हुने बताइएको छ ।