प्रधानमन्त्रीलाई दुई घण्टा पहिला उडाउँदा मध्यरातमा ३१ यात्रु विमानस्थलमा अलपत्र (भिडियो सहित)

काठमाडाैँ । प्रधानमन्त्री पुष्पकमल दाहाल प्रचण्डलाई निर्धातिर समय भन्दा २ घण्टा अगाडिनै दुबई उडाउँदा टिकट काटेका ३१ नेपाली यात्रु काठमाडौँ अलपत्र परेका छन् ।

Watch On

बुधबार राति ११ बजे उडान तालिका भएको नेपाल एयरलाइन्सको विमानमा प्रधानमन्त्री प्रचण्डको टोली दुबई जाँदै थियो । भिभिआइपी सवार भएपनि नेपाल एयरलाइन्सले अन्य यात्रुलाई पनि टिकट बेचेको थियो । तर प्रधानमन्त्रीको टोली विमानस्थलमा ८ बजेनै पुगेपछि नेपाल एयरलाइन्सले साढे ९ बजेनै विमान उडायो ।

तर ३१ जना यात्रुका लागि भने ११ बजेको समय तोकेर टिकट बेचिएको थियो । उनीहरू ८ बजेनै विमानस्थल पुग्दा पनि उड्न पाएनन् । सोही विमानमा दुबई जान उडान समय भन्दा ३ घण्टा अघिनै विमानस्थल पुगेका प्रज्ज्वल विक्रम राणाका अनुसार ८ बजेनै नेपाल एयरलाइन्सको बोर्डिङ काउन्टर बन्द भएको थियो । 

तर यात्रुहरूको लागि कुनै सूचना दिइएको थिएन । राणाका अनुसार विमान उडिसकेपछि मात्रै कर्मचारीले प्रधानमन्त्रीको सवारीका कारण फ्लाइटलाई दुई घण्टा अगाडि सार्न माथिबाट अर्डर आएको र भिभिआइपी सवारी भएपछि आफूहरूले पनि केही गर्न नसक्ने जवाफ दिएर उम्किए ।

कर्मचारीको जवाफ पछि वैदेशिक रोजगारी, अध्ययन तथा भ्रमणका लागि दुबई र दुबई ट्रान्जिट पारेर अन्य मुलुकमा जान लागेको ३१ जना विमानस्थल निरिह बनेका थिए । उनीहरूले विवाद गरेपछि भने एयरलाइन्सले भिभिआइपीको सवारीका लागि उडान २ घण्टा अगाडि फलाइट सार्दा यात्रु छुटेको भन्दै पत्र थमाइदियो । विमानस्थलमा अलपत्र परेका यात्रुको दबाब पछि एयरलाइन्सले उनीहरुलाई होटल लगेर राखेको छ ।

नेपाल एयरलाइन्सका प्रवक्ता रमेश पौडेलका अनुसार उनीहरूलाई आजका उडानमा मिलाएर पठाइने छ । तर यात्रु अलपत्र पारेको विषयमा भने नेपाल एयरलाइन्सले इमले र फोन गरेर फलाइट अघि सारिएको जानकारी गराएको दाबी गर्दै चोखिन खोजेको छ। ३१ जना यात्रुहरूले भने आफूहरूलाई कतैबाट कुनै सूचना नआएको बताए ।

रोजगारीका लागि दुबई जानका लागेका एक यात्रुले सिधाकुरासँग भने "सूचना पाएको भए पैसा तिरेर काटेको टिकट छुटाउन कसलाई रहर हुन्छर ? बिहिबार कम्पनीमा हाजिर हुनु छ, आफ्नो उडानको टुंगो छैन" ।