गोकर्णेश्वर महादेव मन्दिरमा पितृभक्तको घुइँचो (तस्बिरहरू)

काठमाडौँ । काठमाडौँ उपत्यकाको पूर्वोत्तर भागमा अवस्थित गोकर्णेश्वर महादेव मन्दिर परिसरमा आज बिहानैदेखि पितृभक्तको घुइँचो लागेको छ ।

Watch On

कुशेऔँसी अर्थात् बाबुको मुख हेर्ने दिनका अवसरमा दिवङ्गत पिताप्रति श्रद्धा व्यक्त गर्न गोकर्णेश्वर उत्तरगया पितृतीर्थ धाममा तर्पण, आमान्न तथा पिण्डदान गर्नेको भीड लागेको हो ।

वर्षभरिका धार्मिक कृत्यमा आवश्यक पर्ने कुश यस दिन घरमा भित्र्याउने परम्परा रहेकाले भाद्र कृष्ण औँसीलाई कुशेऔँसी भनिन्छ । धार्मिक मान्यताअनुसार यस दिन गोकर्णेश्वरमा श्राद्ध तथा तर्पण गरे २१ पुस्तासम्मका पितृले मुक्ति पाउने विश्वास छ ।

गोकर्णेश्वर मन्दिरका पुजारी जगदीश भट्टका अनुसार सत्ययुगमा ब्रह्माले स्थापना गरेको विश्वास रहेको यस तीर्थमा श्राद्ध तथा तर्पण गर्दा पितृले मुक्ति पाउने कुरा धर्मशास्त्रमा उल्लेख छ । कुशलाई भगवान् विष्णुको स्वरूपसमेत मानिन्छ ।

बौद्ध धर्मगुरु ऐतमान लामाका अनुसार बौद्ध धर्मावलम्बीमा पनि बाबुको निधन भएको एक वर्षभित्र गोकर्णेश्वर पुगेर श्राद्ध तथा पूजाआजा गर्ने र त्यसपछि भोज खाने परम्परा छ । यस दिन गोकर्णेश्वर महादेवको दर्शन गरे दिवङ्गत बाबुको प्रतीकात्मक दर्शन गरेको मानिने उनले बताए ।

भाद्र कृष्ण औँसीका दिन गोकर्णेश्वरमा मेला लाग्ने भएकाले यसलाई गोकर्णे औँसी पनि भनिन्छ । धार्मिक मान्यताअनुसार पशुपतिनाथमा श्री यन्त्र र गोकर्णेश्वरमा बाल यन्त्र रहेकाले पशुपतिनाथको दर्शन गर्नेले गोकर्णेश्वर महादेवको पनि दर्शन गर्नुपर्ने विश्वास छ ।