दुई महिनापछि बस्यो एमाले पुनर्गठन कार्यदलको बैठक

काठमाडौँ । नेकपा एमाले पुनर्गठन कार्यदलको बैठक दुई महिनापछि बसेको छ ।

Watch On

शुक्रबार बिहान ११ बजेदेखि पार्टी केन्द्रीय कार्यालय च्यासलमा बैठक सुरु भएको पार्टी प्रचार विभाग प्रमुख निरज आचार्यले जानकारी दिए ।

बैठकमा कार्यदलले तयार पारेको प्रतिवेदनमाथि छलफल गर्ने कार्यसूची छ । यसअघि असार २५ गते बसेको बैठकले कार्यदलका संयोजक रामबहादुर थापा ‘बादल’ र महासचिव शंकर पोखरेललाई प्रतिवेदन तयार गर्ने जिम्मेवारी दिएको थियो ।

पोखरेल र बादलले छुट्टाछुट्टै प्रतिवेदन तयार पारेका छन् । महासचिव पोखरेलले तयार पारेको प्रतिवेदन अध्यक्ष केपी शर्मा ओलीले अस्वीकार गर्दै अर्को प्रतिवेदन तयार गर्न भनेपछि संयोजक बादलले छुट्टै प्रतिवेदन तयार पारेको एमालेका एक नेताले बताए । उनका अनुसार बादलले आजको बैठकमा त्यही प्रतिवेदन पेस गर्नेछन् ।

गत फागुन २१ गतेको प्रतिनिधिसभा निर्वाचनमा एमाले २५ सिटमा खुम्चिएपछि अध्यक्ष ओलीको राजीनामा र पार्टी पुनर्गठनको बहस सुरु भएको थियो । सचिवालय बैठकमा समेत अधिकांश सदस्य पार्टी पुनर्गठनको पक्षमा उभिएपछि कार्यदल गठन गरिएको थियो ।

जेठ १० गते गठन गरिएको कार्यदललाई एक महिनाभित्र सुझावसहितको प्रतिवेदन पेस गर्ने कार्यादेश दिइएको थियो । तर, अहिलेसम्म प्रतिवेदनले अन्तिम रूप पाउन सकेको छैन ।

कार्यदलले आठ भौगोलिक प्रदेश, गैरभौगोलिक क्षेत्र र विभिन्न निकायसमेत गरी १३ समूहबाट सुझाव लिएको छ । ती सुझाव समेटेर प्रतिवेदनलाई अन्तिम रूप दिने तयारी गरिएको छ ।