सिमरा विमानस्थलमै शंकर पोखरेल र महेश बस्नेतलाई कालोमासो दल्ने योजनामा थिए जेनजी युवा, अनि रोकियो बुद्ध एयरको उडान

बारा । नेकपा एमालेका महासचिव शंकर पोखरेल र  नेता महेश बस्नेत मधेस प्रदेश स्तरीय युवा जागरण अभियानमा सहभागी हुन आज बारा आउने कार्यक्रम तय भएपछि जेनजी समूहका युवाहरूले विरोध गरेका छन् । बस्नेत सहभागी हुने भनिएको परवानीपुरस्थित कार्यक्रममा उनी अहिलेसम्म नआए पनि विरोध प्रदर्शनले वातावरण तनावग्रस्त बनेको छ ।

सिमराका जेनजी समूहका युवाहरूले बिहानैदेखि सिमरा विमानस्थल घेराउ गर्दै विरोध जनाइरहेका छन्। विमानस्थल सुरक्षाका लागि जनपथ र सशस्त्र प्रहरीको ठूलो टोली परिचालन गरिएको छ ।

नेता बस्नेतलाई स्वागत गर्न विमानस्थलमा पूर्व मन्त्री तथा एमाले नेता किसान श्रेष्ठ, ज्वालाकुमारी साह, अच्युत मैनालीलगायतका नेताहरू उपस्थित छन् । अहिले प्रदर्शनकारीहरू सिमरा विमानस्थलको धावनमार्गमै प्रदर्शन गरिरहका छन् । एमाले महासचिव पोखरेल र महेश बस्नेत लगायतका अन्य नेता विमानबाट ओर्लिने बित्तिकै कालोमोसो दलेर बजार घुमाउने तयारी गरिएको जेनजी युवाहरुले बताएका थिए । 

बस्नेत बारा आउने सूचना सार्वजनिक भएपछि मंगलबारदेखि नै जेनजी युवाहरूले सामाजिक सञ्जालमार्फत विरोध कार्यक्रम घोषणा गरेका थिए ।

यता महासचिव पाखेरेल र बस्नेत सवारी बुद्ध एयरको विमान सुरक्षाको कारण उडान गर्न नसकिने भन्दै धावनमार्गबाट पार्किङमा ल्याइएको छ । सोहि विमाानमा सवार पत्रकार राजन कुइँकेलका अनुसार त्रिभुवन अन्तराष्ट्रिय विमानस्थलबाट आन्तरकि तर्फ सिमरा उड्न लागेको विमानमा नेताहरु पनि थिए । तर सिमरा विमानस्थल बाहिर प्रदर्शन चर्किएपछि उनीहरुसहित यात्रुहरुलाई अहिले फेरी विमानस्थलमै राखिएको छ ।

बुद्ध एयरले सबै यात्रुलाई जहाजबाट उतारेर अर्को सूचना नभएसम्म उडान नहुने जानकारी दिएको छ ।  प्रदर्शनकारीहरु धावनमार्गमै पुगेपछि असुरक्षाका कारण काठमाडौंबाटै विमान उड्न नसकेको जानकारी गराइएको थियो ।