जागिरबाट निकालेको झोकमा पानी उद्योग व्यवस्थापकको हत्या, २ जना पक्राउ

बारा । बाराको प्रसौनी गाउँपालिका–६, भलुही चोक नजिक रहेको किरन बेभरेज नेपाल प्राइभेट लिमिटेडका व्यवस्थापक रामकिशोर सिंहको हत्यामा संलग्न रहेको आरोपमा बारा प्रहरीले दुई जनालाई पक्राउ गरेको छ ।

Watch On

जिल्ला प्रहरी कार्यालय बाराका प्रवक्ता प्रहरी निरीक्षक खेमप्रसाद नेपालका अनुसार पक्राउ पर्नेमा पर्सा जिल्लाको वीरगंज महानगरपालिका–२२, मनियारीका २१ वर्षीय राजन कुमार राम र सोही ठाउँका ३२ वर्षीय प्रमोद साह तुरहा रहेका छन् ।

प्रहरीले घटनास्थलबाट रगत लागेको फलामको छुरा १ थान र रगत लागेको ईटा १ थान बरामद गरेको छ । मंसिर ११ गते बेलुका, उद्योगको २५ मिटर उत्तरतर्फको खाल्डोमा सिंहको शव धारिलो हतियार प्रयोग गरी घाँटी रेटेर हत्या गरिएको अवस्थामा फेला परेको थियो ।

प्रारम्भिक अनुसन्धानका अनुसार, मृतक रामकिशोर सिंहले राजन कुमार रामलाई चालकको रूपमा काममा राखेका थिए । गत वर्षको गढीमाई मेलामा गाडीको कलच प्लेट जलाएको विषयमा उनीहरुबीच विवाद हुदैँ आएको थियो ।

राजनले फ्याक्ट्रीले तोकेको पानीको मूल्य ११० रूपैयाँमा बिक्री गर्नुपर्ने भए पनि व्यक्तिगत फाइदाका लागि ११५–१२० रुपैयाँमा बिक्री गरेको साहु रामकिशोरले पत्ता लगाएपछि मंसिर १० गते उनलाई कामबाट हटाएका थिए । यसपछि दुवैजनाले रिसबिका बीच जाँड–रक्सी सेवन गर्दै हत्याको योजना बनाएको प्रारम्भिक अनुसन्धानमा पुष्टि भएको छ ।

सिंह फ्याक्ट्रीमा कार्यरत अवस्थामा राजन र प्रमोदले बोकेका छुरा र ईट प्रयोग गरी विभत्स हत्या गरेको अनुसन्धानबाट खुलेको छ ।

सूचनाको आधारमा जिल्ला प्रहरी कार्यालय बारा तत्काल घटनास्थल पुगेको थियो । अनुसन्धानमा संलग्न फरार व्यक्तिहरूको खोजतलाश र पहिचान गरी पर्सा छिपहरमाई–५, भिस्वा नाकाबाट भारततर्फ भाग्दै गरेको अवस्थामा राजन कुमार राम नियन्त्रणमा लिइएको थियो । प्रमोद साह तुरहालाई वीरगंज–२२ मा लुकिछिपी बसेको अवस्थामा १६ घण्टाभित्र प्रभावकारी रूपमा पक्राउ गरिएको छ ।

बारा जिल्ला अदालतले पक्राउ परेका दुवैलाई थप अनुसन्धानका लागि ७ दिनको म्याद दिएको जिल्ला प्रहरी कार्यालय बाराले जनाएको छ ।