पोखरा र भैरहवा विमानस्थल भ्रष्टाचारबारे राजन दाहालको भित्री खुलासा

काठमाडाैँ । लेखनाथ दाहाल (राजन) विघटित प्रतिनिधिसभा सदस्य हुन् । उनी तत्कालीन माओवादीका केन्द्रका तर्फबाट २०७९ मा सिन्धुलीबाट निर्वाचित भएका थिए ।  भ्रष्टाचार, अनियमितता, मुलुकको फितलो कूटनीति, अर्थराजनीति देखि भू(राजनीतिसम्म र जनताको जीवनस्तरसँग जोडिएको मुद्दालाई उनले संसदबाट सधैँ जोडदार रुपमा उठाए । 

जनयुद्धदेखि मूलधारको राजनीतिसम्मको यात्रामा पछिल्लो समय माओवादी आन्दोलन फितलो बन्दै गएको छ । तर, जहाँ राजन दाहाल उभिन्छन् त्यहाँ माओवादी फितलो भयो भन्ने नसुनिने दाहाललाई सङ्गत गरेकाहरू बताउँछन् । 

सिङ्गो एमालेसँग भिड्न माओवादीको एक्लो लडाकुका रुपमा पनि दाहालको परिचय छ। राजनीतिको मञ्च देखि लडाइँको मैदानसम्म सबै कलाका लागि दाहाल चिनिन्छन् । त्यसो त सिन्धुलीका जनतासामु उनी लोकप्रिय र विकासप्रेमी नेताको रुपमा पनि चिनिन्छन् ।

दाहालले जवानी त्याग गरेको माओवादी आन्दोलन भलै जेन-जी आन्दोलनपछि माओवादी विघटन भएको छ । हाल  १८ वटा नयाँ कम्युनिष्ट घटक एक भएर नेपाली कम्युनिष्ट पार्टी (नेकपा) बनेको छ र उनी यसैको नेता हुन् ।

संसदमा हुँदा दाहाल देशको भ्रष्टाचार र अनियमितता जाँच गर्ने सार्वभौम संसदको शक्तिशाली सार्वजनिक लेखा समितिको सदस्य थिए । उक्त समितिको पनि अनियमितताका उजुरी छनोट गर्ने महत्वपूर्ण भूमिकामा दाहाल थिए । 

दाहाल सदस्य रहेको समितिले पछिल्लो साढे २ वर्षमा ५१ वटा ठूला भ्रष्टाचार र अनियमितताको उजुरी अध्ययन गरेको दाहाल बताउँछन् । आफ्नो लेखा समितिको अनुभवले नेपालमा भ्रष्टाचार एउटा महारोगको रुपमा आफूले पाएको उनले सुनाए ।

‘भ्रष्टाचार नहुने ठाउँ र भ्रष्टाचार नगर्ने मानिस नै मुलुकमा नरहेको भन्दै दाहाल भन्छन् ‘अब त भ्रष्टाचार पनि लाख र करोडमा छोडेर अरबमा पुगेको पाएँ ।’ संसदको सार्वजनिक लेखा समितिमा पोखरा अन्तराष्ट्रिय विमानस्थल  र भैरहवा विमानस्थल लगायतका चर्चित भ्रष्टाचार मुद्दाको गहन अध्ययन गरेका उनै दाहाललाई हामीले सिधाकुरा पड काष्टमा निम्त्याएका छौँ ।

गत साता मात्रै पोखरा विमानस्थल भ्रष्टाचार प्रकरणमा  अख्तियार दुरुपयोग अनुसन्धान आयोगले ५ पूर्वमन्त्री, १० बढी सचिवसहितका ५५ व्यक्ति र एक कम्पनी विरुद्ध ८ अर्ब ३७ करोड भ्रष्टाचार गरेको आरोपमा मुद्दा दायर गर्यो ।

तर, संसदीय समितिमा सो प्रकरणको अनुसन्धान गरेका दाहाल अख्तियारको उक्त अभियोजनबाट सन्तुष्ट छैनन् । उनले त्यो भ्रष्टाचार मुद्दामा अख्तियारले गहिरो अध्ययन र अनुसन्धान नगरेको उनको ठम्याइ छ ।  

समितिबाट ७ दिनभित्र कारबाही गर्न दिएको निर्देशनको महिनौँपछि सो मुद्दा अदालत लगिएको र ठूला संलग्नलाई बचाइएको तथा मुद्दा अपूर्ण रहेको दाहालको जिकिर छ । आउनुहोस् उनै दाहाललाई यसबारे बिस्तृतमा हेरौँ सुनौँ ।