रास्वपासँग ठूलो पद मागेको थिइनँः कुलमान घिसिङ

काठमाडौँ । रास्वपासँगको सहमति भंग भएपछि उज्यालो नेपाल पार्टीको अध्यक्ष बनेका कुलमान घिसिङले रास्वपासँग आफूले ठूलो पद नमागेको बताएका छन् । उज्यालो नेपाल पार्टीको अध्यक्ष नियुक्त भएपछि आयोजना गरिएको पत्रकार सम्मेलनमा उनले आफू रास्वपाको साधारण सदस्य भएर बस्न तयार रहेको बताएका छन् । उनले अन्तिम चरणमा आफूले एक प्रस्ताव गरेपनि सहमति टिक्न नसेकेको बताए । 
 
‘म आफैं एउटा उपाध्यक्ष त्यो पनि वरीयतामा तल रहेर पनि सहेर गएको थिएँ । अन्तिम चरणमा मैले एउटा प्रस्ताव पनि गरेको थिएँ । म रास्वपाको साधारण सदस्य भएर बस्छु, केन्द्रीय समितिका साथीहरूलाई एड्जसमेन्ट गर्छु भनेको थिएँ ।’ उनले भने । 

उनले रास्वपासँगको सहमतिपछिको १२ दिन आफू र उज्यालो नेपाल पार्टीका सदस्यहरुका लागि निकै पीडादायक भएको बताए । ‘वास्तवमा यो १२ दिन हाम्रा लागि पीडादायी भयो ।’ 

घिसिङले एकताका समयमा रास्वपासंग भएको सहमति कार्यान्वयन नभएकाले एकताबाट अलग हुने निर्णय गरिएको बताए । त्यस्तै रास्वपाले पनि एकतर्फी रुपमा सहमति भङ्ग भएको घोषणा गरेकै कारण आफुहरु एक्लै अघि बढ्ने निर्णयमा पुगेको घिसिङले बताए । 

अब पार्टीलाई समावेशी रुपमा देशव्यापी बनाइने र चिम चूनाव चिन्हबाट निर्वाचनमा होमिने उल्लेख गरे । घिसिङले समानुपातीकका बिषयका व्यवस्थापन भइरहेको भन्दै व्यवस्थापन हुन नसके प्रत्यक्षमा मात्रै भएपनि १६५ निर्वाचन क्षेत्रमा उम्मेदवारी दिएर निर्वाचनमा जाने उद्घोष गरे । 

बैठकमा उज्यालो नेपाल पार्टीका अनुपकुमार उपाध्यायले निजी कारण देखाउदै राजीनामा दिएका थिए भने उपाध्यायले राजीनामा दिएपछि उज्यालो नेपालले कुलमान घिसिङलाई अध्यक्ष पदमा चयन गरेको छ ।