धादिङ १ मा राजेन्द्र पाण्डेको ‘दायाँ हात’ मानिने कुमार पाण्डेले त्यागे नेकपा, रास्वपाबाट चुनाव लड्ने

काठमाडौँ । नेपाली कम्युनिष्ट पार्टी (नेकपा) धादिङका नेता राजेन्द्र पाण्डेका राजनीतिक विश्वास पात्र मानिने कुमार प्रसाद पाण्डे रास्वपा प्रवेश गरेका छन् । 
नेकपाको केन्द्रिय सदस्य परित्याग गरेर उनी रास्वपा प्रवेश गरेका हुन् । लामो समय एमाले राजनीतिमा संलग्न पाण्डे एमाले विभाजन पछि माधव कुमार नेपाल नेतृत्वको समाजवादी पार्टीमा आवद्ध थिए। 

जेनजी आन्दोलन पछि समाजवादी र माओवादी मिलेर नेपाली कम्युनिष्ट पार्टी बनेपछि पाण्डे सो पार्टीको केन्द्रिय सदस्यको भूमिकामा थिए । उनी राजनीतिसँगै व्यापारिक पृष्ठभूमिका व्यक्ति हुन् ।

पाण्डे फागुन २१ मा हुने प्रतिनिधिसभा निर्वाचनमा धादिङ निर्वाचन क्षेत्र नम्बर एकमा उम्मेदवार हुने गरी रास्वपा प्रवेश गरेको पाण्डे निकटस्थहरूको दाबी छ । 

‘उहाँले प्रतिनिधिसभा निर्वाचनमा उम्मेदवार हुने गरी पुरानो पार्टी परित्याग गर्नु भएको हो,’ स्रोतले सिधाकुरासँग भन्यो, ‘पाण्डेले उम्मेदवार हुन आवश्यक शुल्क समेत बुुझाइसकेका छन् ।’ 

यता रास्वपाले पनि यसको आधिकारिक पुष्टि गरेको छ । प्रत्यक्ष निर्वाचन आकाङ्क्षीको रुपमा पाण्डे प्रक्रिया पुरा गरेर रास्वपा प्रवेश गरेको रास्वपाले जनाएको छ । उनको आवेदन स्वीकृतसमेत भइसकेको छ ।  

रास्वपा प्रवेश गरेका पाण्डे धादिङमा विरासत बोकेका नेता राजेन्द्र पाण्डेका चुनावी टिमका प्रमुख रणनीतिकार, सडकस्तरका अभियान संयोजक र विश्वस्त सहयोगीका रूपमा चिनिन्थे ।