भावी प्रधानमन्त्रीको उम्मेदवार सभापति गगन थापालाई बनाउने काँग्रेसको घोषणा

काठमाडौँ । नेपाली कांग्रेसले पार्टी सभापति गगन थापालाई प्रधानमन्त्रीको उम्मेदवार घोषणा गरेको छ । शुक्रबार पार्टी कार्यालय सानेपामा बसेको कांग्रेस केन्द्रीय कार्यसमिति बैठकले थापालाई प्रधानमन्त्रीको उम्मेदवार घोषणा गर्ने निर्णय गरेको प्रवक्ता देवराज चालिसेले जानकारी दिए ।

बैठकमा उपसभापति विश्वप्रकाश शर्माले थापालाई प्रधानमन्त्रीको उम्मेदवार घोषणा गर्ने प्रस्ताव पेश गरेका थिए । उपसभापति शर्माको प्रस्तावलाई बैठकले पारित गरेको प्रवक्ता चालिसेले बताए । बैठकले निर्वाचनलाई प्रभावकारी बनाउन प्रचार प्रसार समिति गठन गरेको छ ।

त्यस्तै बैठकले केन्द्रीय कार्यसम्पादन समिति गठन गर्ने निर्णय गरेको छ भने जेनजी आन्दोलनबाट क्षतिग्रस्त पार्टीको भवन पुननिर्माणका लागि पार्टीका पूर्व कोषाध्यक्ष उमेश श्रेष्ठको संयोजकत्वमा भवन निर्माण समिति गठन गरिएको प्रवक्ता चालिसेले बताए ।

त्यस्तै बैठकपछि उपसभापति विश्वप्रका शर्माले परिवर्तनको अपेक्षालाई आफ्नो पार्टीभित्र अभ्यास गर्ने पार्टी कांग्रेस नै भएकाले अव मुलुकको प्रधानमन्त्रीको रुपमा सभापति थापालाइ अघि सारिएको बताए । सरकारमा रहेका भएका कमिकमजोरीलाई सच्चाउदै नयाँ भिजनका साथ मुलुकलाई अघि बढाउने काम कांग्रेसले मात्रै गर्न सक्ने उनले बताए ।

उनले प्रतिकुल समयमा संयम राखेर विषयवस्तुलाई परिपक्व ढंगले हल गर्नसक्ने क्षमता कांग्रेस सभापति थापासंग मात्रै रहेको बताए । कांग्रेसले परिवर्तित समयलाई सम्बोधन गर्दै जनताको चाहना र भावनाअनुरूप निर्वाचनमा होमिने निर्णय गरेको छ । कांग्रेसका विशेष महाधिवेशनबाट चयन भएपछि नयाँ कार्यसमिति सदस्यहरु पहिलो पटक पार्टी कार्यालय सानेपा पुगेका हुन् ।