तोकिएकै मितिमा भयमुक्त र विश्वसनीय वातावरणमा निर्वाचन सम्पन्न हुन्छः प्रधानमन्त्री कार्की

काठमाडौँ । प्रधानमन्त्री सुशीला कार्कीले स्वच्छ, निष्पक्ष, शान्तिपूर्ण र भयमुक्त वातावरणमा निर्वाचनलाई सम्पन्न गरी मुलुकलाई दिगो लोकतान्त्रिक स्थायित्वको नयाँ युगको ढोका उघार्ने प्रयत्नमा पूरै ऊर्जा लगाएको बताएकी छन् ।

प्रजातन्त्र दिवसका अवसरमा बिहीबार सैनिक मञ्च टुँडिखेलमा आयोजित विशेष समारोहलाई सम्बोधन गर्दै प्रधानमन्त्री कार्कीले सवैको समूहिक प्रयासबाट तोकिएकै मितिमा र भयमुक्त र विश्वसनीय वातावरणमा निर्वाचन सम्पन्न हुने सुनिश्चित भएको समेत बताएकी हुन ।

Watch On

आगामी निर्वाचनबाट आउने संसद् र सरकारले लोकतन्त्रलाई अझ जीवन्त, नतिजामुखी र जनउत्तरदायी प्रणालीका रूपमा अघि बढाउने उनले विश्वास व्यक्त गरेकी थिइन ।

प्रधानमन्त्री कार्कीले लोकतन्त्र केवल प्रक्रिया मात्र नभएको उल्लेख गर्दै यसले नतिजा दिनुपर्नेमा जोड दिइन । वर्तमान सरकारले जेनजी आन्दोलनको आवाजलाई गम्भीरतापूर्वक लिएको जनाउँदै प्रधानमन्त्री कार्कीले सुशासन, पारदर्शीता, समन्याय र जवाफदेहितालाई व्यवहारमा रूपान्तरण गर्ने दिशामा सरकारका प्रयास अभिमुख भइरहेको स्पष्ट पारेकी थिइन ।

उनले एउटै वर्ग सत्तामा स्थायी रूपमा हालीमुहाली गरिरहने, स्रोत–साधनमा एकाधिकार जमाइरहने र राज्य संरचनामा पजनी चलाइरहने सिलसिलाको अन्त्य नसकेका कारण नागरिकहरुमा असन्तोष पैदा भएको धारणा व्यक्त गरेकी थिइन ।उनले सबल लोकतन्त्रले असन्तोषलाई दमन नगर्ने, बरु सुधारको अवसरका रूपमा ग्रहण गर्ने बताइन ।

प्रधानमन्त्री कार्कीले युवालाई तिरष्कार गरेर कुनै राष्ट्र शान्त रहन नसक्ने भएकाले सन्तोषलाई दबाएर नभइ, सम्बोधन गरेर मात्र राष्ट्र अघि बढ्न सक्ने धारणा व्यक्त गरेकी थिइन । विभिन्न आन्दोलनका वीर योद्धाहरूले देखेका समुन्नत र न्यायपूर्ण नेपालको सपना साकार पार्नका निम्ति हातेमालो गरी सबै एकजुट हुन उनले अपिल समेत गरेकी छन् ।