दाङ ३ का रास्वपा उम्मेदवार कमल सुवेदीको कार्यालय तोडफोड

तुलसीपुर,दाङ । दाङ क्षेत्र नम्बर ३ का रास्वपा उम्मेदवार कमल सुवेदीको निर्वाचन क्षेत्रिय कार्यालय तोडफोड भएको छ ।

तुलसीपुरको ग लाइनमा रहेको सम्पर्क कार्यालय तोडफोड भएको जिल्ला प्रशासन कार्यालयले जनाएको छ । प्रहरीका अनुसार कार्यालय तोडफोड गरेर निर्वाचन प्रचार सामाग्री च्यातिएका छन् ।

Watch On

रास्वपाका कार्यकर्ताहरुले भने एमालेका कार्यकर्ताहरुले तोडफोड गरेको आरोप लगाएका छन् । रास्वपाका उम्मेदवार सुवेदीले कार्यालय तोडफोड भएको खबर पाएकाले चुनावी प्रचारबाट फर्कीएर कार्यालय जाँदै गरेको सिधाकुरालाई बताए ।

शुक्रबार मात्रै रास्वपाले दाङ २ मा सभापति रवि लामिछानेको उपस्थितिमा चुनावी सभा गरेको थियो । विहीबार राती दाङमा एमालेको चुनाव चिन्हमा आगो लागेको घटनाले नेकपा एमालेका नेता कार्यकर्ता आक्रोशित भएका छन् ।

त्यस्तै यस अघि बिहीबार बेलुका रवि लामिछानेले कुरीरहेको रास्वपा समर्थकले सोही क्षेत्रमा एमालेको झण्डा जलाएको भन्दै एमालेले आपत्ति जनाएको थियो ।

पार्टीको झण्डा रास्वपा कार्याकर्ताले जलाएको आरोप लगाउँदै एमाले युवासँघ दाङ जिल्ला, प्रदेश र केन्द्रले छुट्टाछुट्टै विज्ञप्ति जारी गर्दै आपत्ति जनाएको थियो । शुक्रबार दिउँसो रास्वपाको निर्वाचन सभा लगत्तै युवा संघ दाङले घोराहीमा विरोध र्याली निकालेको थियो ।

एमालेले झण्डा जलाएको आरोप रास्वपामाथि लगाएको छ भने रास्वपाले भने त्यसको खण्डन गरेको छ । शुक्रबारको आमसभामै रास्वपा सभापति रवि लामिछानेले कुनै पनि दलको झण्डा जलाउने व्यक्ति रास्वपामा रहन नसक्ने र त्यसलाई कारबाही गरिने बताएका थिए ।