मानव अधिकार आयोगले भन्यो– शान्तिसुरक्षालाई मजबुत बनाऊ

काठमाडौं । राष्ट्रिय मानव अधिकार आयोगले फागुन २१ गते हुन गइरहेको प्रतिनिधिसभा निर्वाचनको दिन नजिकिँदै गर्दा देशका विभिन्न भागहरुमा भइरहेका गतिविधि तथा घटना र त्यसले देशको शान्तिसुरक्षा र आसन्न निर्वाचनमा पार्न सक्ने प्रभावप्रति आयोगको गम्भीर ध्यानाकर्षण भएको जनाएको छ।

आयोगले आज एक विज्ञप्ति जारी गर्दै दाङलगायतका विभिन्न जिल्लामा केही दलहरुका कार्यकर्ताबीच  सिर्जना भएको विवाद तथा रौतहट पर्सालगायतका जिल्लामा विभिन्न समूहबीच भएका विवादका कारण निषेधाज्ञा समेत जारी गर्नुपर्ने अवस्थाले निर्वाचनका साथै शान्ति सुरक्षामा थप चुनौती थपिएको देखिएको जनाएको हो ।

Watch On

आयोगले राजनीतिक दलका नेता, उम्मेदवार तथा कार्यकर्ताहरुले एकअर्को दल, उम्मेदवार र नेताहरुप्रति व्यक्त गर्ने अमर्यादित तथा घृणायुक्त अभिव्यक्तिले शान्तिसुरक्षा र निर्वाचनको वातावरणमा समेत थप चुनौती सिर्जना हुन सक्ने आशंका व्यक्त गरेको छ। आयोगले शान्ति सुरक्षाको अवस्था बलियो बनाउन सरकारलाई आग्रह गरेको छ।
आयोगले राजनीतिक दलहरु, उम्मेदवार तथा कार्यकर्ताहरुले निर्वाचन आचारसंहिता विपरीत चुनावको प्रचारप्रसार र राजनितिक गतिविधिमा प्रत्यक्ष परोक्ष रुपमा बालबालिकाको प्रयोग गरेको, सामाजिक सञ्जालमा प्रकाशित-प्रसारित हुने निर्वाचनका गतिविधिमा बालबालिकालाई संलग्न गराएको तथा निर्वाचन आचारसंहिताको पूर्ण रुपमा पालना नगरेको पाइएको भन्दै निर्वाचनमा बालबालिकाको प्रयोग हुन नदिन आग्रह गरेको छ।