काँग्रेसको सरकार बनेपछि सम्पती छानविनको कार्य देउवा र आफैबाट सुरु गर्छुः गगन थापा

काठमाडौँ । नेपाली कांग्रेसका सभापति गगनकुमार थापाले आफ्नो पार्टीको सरकार बनेपछि शेर बहादुर देउवा र आफुबाट सम्पती छानविनको काम सुरु गर्ने बताएका छन् ।

शुक्रबार पोखरामा आयोजित चुनावीसभालाई सम्बोधन गर्दै थापाले कांग्रेस नेतृत्वमा सरकार बनेपछि भ्रष्टाचार छानबिनका लागि शक्तिशाली आयोग बनाउने र सवै भन्दा पहिला देउवा र आफ्नो सम्पती छानविन गरेर काम सुरु गर्ने बताएका हुन ।

Watch On

निर्वाचनपछिको परिणामलाई सिंहदरबार जलाउन लगाउने र मौका परे जेलबाट भाग्ने अतिवाद आउन सक्ने भन्दै पाँच बर्षको समय देशलाई सम्हाल्नुपर्ने उनले बताए । उनले  ख्याल गरेर गाडीलाई पाँच बर्षभित्र गन्तव्यसम्म पुराउने संकल्प गरेर आएको नयाँ कांग्रेस भएको उल्लेख गरेका थिए ।

थापाले कांग्रेसको सबैभन्दा ठूलो तागत संगठन भएकाले त्यसैको सहारामा मतदाताको घर–घरमा पुग्नुपर्नेमा जोड दिएका थिए । सभापति थापाले सामाजिक सञ्जालमार्फत अरूलाई टीकाटिप्पणी र आक्षेप नलगाई कार्यकर्ताको घरमा पुग्न र अबको पाँच वर्ष खेर नफाल्नेमा आश्वस्त पार्न समेत आग्रह गरे ।

उनले कांग्रेस संकल्प र प्रतिज्ञा गरेर आएकोले त्यसका लागि पाँच वर्ष जनताले मौका दिन आवश्यक रहेकाले मतदाता बुझाउन सक्नुपर्ने बताए । त्यसैगरी कांग्रेसका उपसभापति विश्वप्रकाश शर्माले आफ्नो पार्टीले देशलाई बदल्न चाहेको भन्दै चुनावी प्रतिस्पर्धामा कांग्रेसको दुश्मन कोही पनि नरहेको बताए ।

निर्वाचनपछि सबै दलहरुले सत्तापक्ष र प्रतिपक्षमा रहेर मिलेर देशका लागि काम गर्नुपर्ने भएकाले निर्वाचनको मैदानमा दुश्मनको व्यवहार गर्न नहुने शर्माको भनाइ छ ।