मतदाता लक्षित भिडियो पोस्ट भएपछि रवि लामिछानेको फेसबुक पेज ह्याक गर्ने प्रयास!

काठमाडौँ । राष्ट्रिय स्वतन्त्र पार्टी (रास्वपा)का सभापति रवि लामिछानेको आधिकारिक फेसबुक ह्याक गर्ने प्रयास भएको छ । अनाधिकृत पहुँचको बारम्बार प्रयास भएपछि लामिछानेको एकाउन्ट तथा पेज मेटाले ‘लक’ गरिदिएको छ । लामिछानेका स्वकिय सचिव अविनाश आचार्यका अनुसार बाह्य व्यक्तिहरूले पेजमा अनधिकृत पहुँच बनाउन पटक पटक प्रयास गरेपछि सुरक्षा संवेदनशीलतालाई ध्यानमा राख्दै मेटाले लक गरेको जानकारी आएको छ । 

अहिले प्राविधिक टोली फेसबुक फिर्ता ल्याउन प्रयासमा छन् ।  पेज पूर्ण रूपमा सुरक्षित नभएसम्म र पुनः नियन्त्रणमा नआएसम्म उक्त पेजबाट कुनै पनि नयाँ सामग्री पोस्ट नहुने लामिछानेको सचिवालयले जनाएको छ । 

Watch On

पेज लक भएको अवस्थामा त्यहाँबाट कुनै पनि शंकास्पद पोस्ट, सन्देश वा लिङ्कहरू सार्वजनिक भएमा त्यसलाई आधिकारिक नमान्न र भ्रममा नपर्न पनि सचिवालयले आग्रह गरेको छ । 
हाल फेसबुकको सुरक्षा प्रक्रियाअनुसार पेजलाई पुनः सञ्चालनमा ल्याउने प्रयास भइरहेको र यसबिचमा आधिकारिक जानकारीका लागि पार्टीको वेबसाइट वा अन्य प्रमाणित सामाजिक सञ्जालहरू मात्र पछ्याउन सचिवालयले अनुरोध गरेको छ ।
लामिछानेले सोमबार साँझ निर्वाचन लक्षित भिडियो सामाग्री पोस्ट गरेका थिए । उक्त पोस्टमा उनको उच्च रिच थियो । 
लामिछानेको सचिवालयले भन्यो, भिडियो पोस्ट गरेपछि उनको पेजमा अनाधिकृत पहुँचको बारम्बार प्रयास भएको थियो ।