वीरगञ्जमा बम बनाउने सामान सहित नेकपाका उम्मेदवार मनोज कुमार चौधरी पक्राउ

पर्सा । वीरगञ्जमा बम बनाउने सामान सहित  गाडीमा  सवार वीरगञ्जमा नेकपाका उम्मेदवार मनोज कुमार चौधरी पक्राउ परेका छन् । 

जिल्ला प्रहरी कार्यालय पर्साले बम बनाउने सामान बोकेर हिडेका उम्मेदवार सहित चार जनालाई नियन्त्रणमा लिएको जनाएको छ  ।

Watch On

जिल्ला प्रहरी कार्यालय पर्साका अनुसार गएराति पर्सागढी नगरपालिका–३ बड्निहार बजारस्थित नेपाल प्रहरी र सशस्त्र प्रहरीको संयुक्त चेकजाँच टोलीले नियमित जाँचका क्रममा बड्निहारतर्फ जाँदै गरेको बा २० च १२५० नम्बरको गाडीमाथि शंका लागेपछि चेकजाँच गरेको थियो ।

चेकजाँचका क्रममा गाडीको पछाडिको डिक्कीभित्र पहेँलो टेपले बेरेको चौपाटो आकारको टिनको बट्टाभित्र शंकास्पद वस्तु फेला परेको प्रहरीले जनाएको छ । उक्त वस्तु बम रहेकाले फेला परेपछि गाडीमा सवार व्यक्तिहरूलाई नियन्त्रणमा लिई थप अनुसन्धान अघि बढाइएको छ।

नियन्त्रणमा लिइएकामध्ये वीरगञ्ज महानगरपालिका–२ बस्ने वर्ष ४६ का मनोज कुमार चौधरी (नेपाल कम्युनिष्ट पार्टी) क्षेत्र नं। २ का उम्मेदवार, बारा प्रसौनी गाउँपालिका–५ बस्ने वर्ष २६ का सहज आलम अन्सारी, धनुषाधाम नगरपालिका–१ बस्ने वर्ष ३० का सुरज कर्ण र वीरगञ्ज महानगरपालिका–३ बस्ने वर्ष ६८ का सत्यनारायण थारु रहेका छन ।

यसैगरी, विशेष सूचनाको आधारमा वीरगञ्ज महानगरपालिका–१६ इनर्वास्थित स्थानबाट निर्वाचन लक्षित एकीकृत सुरक्षा टोलीले सुतली बम–२ थान, सुँगुरो आकारको टाइन–२ थान र वायरिङ तार करिब १० मिटर बरामद गरेको प्रहरीले जनाएको छ । उक्त घटनामा संलग्न तीन जनालाई नियन्त्रणमा लिई थप अनुसन्धान भइरहेको छ ।

प्रहरीका अनुसार पक्राउ परेका व्यक्तिहरूमाथि विस्फोटक पदार्थसम्बन्धी कसुर, सार्वजनिक शान्ति विरुद्धको कसुर तथा निर्वाचनसम्बन्धी कसुरमा आवश्यक अनुसन्धान तथा कानुनी कारबाही प्रक्रिया अघि बढाइएको पर्साका प्रहरी उपरीक्षक सुदिपराज पाठकले जानकारी दिएका छन ।