निर्माण पश्चात् यस्तो देखियो, नेपालगञ्ज विमानस्थलको अत्याधुनिक टर्मिनल भवन(तस्बिरहरु)

काठमाडौँ । नेपालगञ्ज विमानस्थलको अत्याधुनिक टर्मिनल भवन निर्माण कार्य सम्पन्न भएको छ । तोकिएको समयअघि निर्माण सकिएको उक्त भवन नेपालगञ्ज विमानस्थल टर्मिनल भवन आयोजनालाई हस्तान्तरण गर्न भने बाँकी नै रहेको छ ।

नागरिक उडड्यन प्राधिकरणका अनुसार भैरहवा र त्रिभुवन अन्तरराष्ट्रिय विमानस्थलभन्दा गुणस्तरीय भवन निर्माण गरिएको जानकारी दिएको छ । काठमाडौँपछिको ठूलो विमानस्थल मानिएको नेपालगञ्ज विमानस्थालबाट भारतको प्रमुख सहर दिल्ली, लखनउ उडान गर्ने उद्देश्य सहित नेपालगञ्ज विमानस्थलको टर्मिनल भवन अन्तरराष्ट्रिय स्तरको निर्माण गरिएको हो ।

Watch On

नेपालगञ्ज विमानस्थल टर्मिनल भवन म्याद सकिनुभन्दा करिब डेढ महिनाअघि शर्मा एण्ड कम्पनीले काम पूरा गरेको हो  कुल लागत रु २ अर्ब ९८ करोड रहेको गुणस्तर रहेको आयोजनाले जानकारी दिएको छ ।

अत्याधुनिक प्रविधि र सुविधा समेटिएको भवनले 'पिकआवर'मा प्रतिघण्टा एक हजार ६०० यात्रुलाई सेवा दिन सक्ने बताइएको छ । विसं २०७९ पुसदेखि काम सुरु गरेको निर्माण कम्पनीले तीन वर्ष अर्थात् आगामी पुसमा सक्नेगरी तीव्रता दिएको थियो । टर्मिनल भवन सेमी बेसमेन्टसहित तीन तलाको छ । जसको बेसमेन्ट कमर्सियल प्रयोजनका लागि निर्माण गरिएको छ ।

पाँच हजार ७५ स्क्वायर मिटरको क्षेत्रफल ओगटेको टर्मिनल भवनभित्र यात्रु चेकजाँच काउन्टर १४, भिआइपी कक्ष तीन, बच्चाका लागि खेल्ने क्षेत्र (चिल्ड्रेन प्लेइङ एरिया) एक, भन्सार र क्वारेन्टिइन चेकजाँचका लागि अलगअलग कक्ष निर्माण गरिएका छन् ।

नयाँ टर्मिनल भवनभित्र बगैँचाका साथै पाँचदेखि १४ मिटर फराकिलो बाटो निर्माण गरिएको छ । टर्मिनल भवनको पेरिफेरिमा ढल निकास तथा बढी भएको पानी निकासका लागि उचित नालाको व्यवस्थापनसमेत गरिएको छ ।
तस्बिरः नेपाल फोटो लाइब्रेरी