शितलनिवासमा यसरी हुँदै छ 'प्रधानमन्त्री' बालेन शाहको शपथ

काठमाडौँ । मुलुकले आज नयाँ प्रधानमन्त्रीका रुपमा राष्ट्रिय स्वतन्त्र पार्टीका वरिष्ठ नेता बालेन्द्र शाह(बालेन) पाउँदै छ । 

राष्ट्रपति कार्यालय शीतल निवासमा आज दिउँसो राष्ट्रपति रामचन्द्र पौडेलले राष्ट्रिय स्वतन्त्र पार्टीका वरिष्ठ नेता बालेनलाई प्रधानमन्त्रीको शपथ गराउने कार्यक्रम छ ।

Watch On

त्यसअघि नेता शाहलाई प्रधानमन्त्रीमा नियुक्त गरिएको जानकारी गराइनेछ । नेपालको संविधानको धारा ७६ को उपधारा १ अनुसार एकल सरकार गठन हुन लागेको हो ।

राष्ट्रपति कार्यालयका अनुसार अपराह्न प्रधानमन्त्रीको पद तथा गोपनियताको शपथ ग्रहणको कार्यक्रम तय गरिएको बताइएको छ । 

शपथ ग्रहण समारोहमा सहभागी हुन विभिन्न राजनीतिक दल, यहाँस्थित कूटनीतिक नियोगका प्रतिनिधि, नागरिक समाज, उच्च सरकारी अधिकारीलाई आमन्त्रण गरिसकिएको छ । प्रधानमन्त्रीको शपथसँगै मन्त्रीहरूको पनि शपथ गराइने बुझिएको छ ।

गत फागुन २१ मा सम्पन्न प्रतिनिधिसभा सदस्य निर्वाचनमा राष्ट्रिय स्वतन्त्र पार्टीले १८२ सिटमा जित निकालेको छ । सो दलले बिहिबार मात्रै नेता शाहलाई संसदीय दलको नेता चयन गरिसकेको छ ।

प्रतिनिधिसभा सदस्य निर्वाचनमा नेता शाहले झापा क्षेत्र नं ५ बाट ६८ हजार ३४८ मत प्राप्त गरी विजयी भएका थिए। 

यसरी हुने छ शपथः
नयाँ प्रधानमन्त्रीकारुपमा बालेन शाहको शपथमा केही नयाँ अभ्यास गरिदैँ छ । 

राष्ट्रपति कार्यालय शीतल निवासमा शुक्रबार दिउँसो हुने शपथका लागि शीतल निवासमा उत्तरतर्फ फर्केको मञ्च बनाइएको छ ।

 राष्ट्रपति कार्यालयका अनुसार शपथ कार्यक्रमको मोडालिटीबारे बुधबार बालेनको टोलीका सदस्यले राष्ट्रपति कार्यालयका अधिकारीसँग छलफल गरेका थिए ।

छलफल अनुसार बालेन दौरा सुरुवाल र भादगाउँले टोपीमा शपथ लिन जाने तयारी छ । 

प्रधानमन्त्रीको शपथका लागि आज(शुक्रबार) दिउँसो १२ः३४ को साइतमा हुने छ । 

शुभ साइत १२ः३४ मा बालेनले ‘म ...’ (शपथको शुरूआत म ... बाट हुने गर्छ) भनेर उच्चारण गर्ने गरी समय मिलाइएको जनाइएको छ । 

शपथ समारोहका औपचारिकरुपमा राष्ट्रपति रामचन्द्र पौडेल सवा १२ बजे मञ्चमा पुगेपछि सुरु हुने छ भने लगत्तै राष्ट्रपति कार्यालयका सचिव महादेव पन्थले  १२ः१५ देखि १२ः३३ सम्ममा औपचारिकरुपमा बालेनलाई प्रधानमन्त्री नियुक्त गरेको जानकारी गराउने छन् । 

राष्ट्रपति कार्यालयले तयार गरेको ‘शेड्युल’ अनुसार १२ः३३ मा राष्ट्रपति र नवनियुक्त प्रधानमन्त्री शपथका लागि माइकको अगाडि उभिने छन् ।

बालेनको शपथका क्रममा बटुकहरूले स्वस्तिवाचन, बौद्ध भिक्षुले मंगलवाचन गर्नुका साथै शंख ध्वनि समेत गरिनेछ । 

प्रधानमन्त्रीको शपथका बेला नेवारी, मैथली, किराँत लगायत विभिन्न जातीय संस्कृति झल्किने कलाचित्र राखिने भएको छ । 

राष्ट्रपति कार्यालयले संवैधानिक निकाय, कूटनीतिक नियोगलगायत प्रतिनिधिलाई राष्ट्रपति कार्यालयले निमन्त्रणा गरेको छ ।