पोर्चुगलका नेपालीको समस्यामा परराष्ट्रमन्त्री शिशिरकाे कूटनीतिक पहल: समकक्षी पाउलाेसँग फोन संवाद

काठमाडौँ ।  पोर्चुगलमा रहेका नेपालीहरूको समस्याका विषयलाई लिएर परराष्ट्र मन्त्री शिशिर खनालले  पोर्चुगलका समकक्षी पाउलो रान्जेलसँग फोन संवाद गरेका छन् । 

संवादमा पोर्चुगल मा रहेका नेपाली कामदार तथा आप्रवासीहरूले भोगिरहेका कानुनी समस्यालाई प्राथमिकताका साथ उठाइएको परराष्ट्र मन्त्रालयले जनाएको छ । 

Watch On

परराष्ट्र मन्त्रालयका अनुसार मन्त्री खनालले पोर्चुगलमा रहेका दुई हजारभन्दा बढी नेपाली नागरिकको अवस्थाबारे गम्भीर चासो व्यक्त गर्दै समाधानका लागि कूटनीतिक पहल गर्न आग्रह गरेका छन् । 

त्यहाँ रहेका केही नेपालीहरू आफ्ना कागजात वैध हुँदाहुँदै पनि नक्कली छाप (फेक स्ट्याम्प ) प्रयोग भएको आरोपका कारण भोगी रहेको कानुनी जटिलतालाई सहज गरिदिन आग्रह गरेका छन् । 

 विशेष गरी प्रहरी चारित्रिक प्रमाणपत्र लगायतका कागजातमा नयाँ दिल्ली स्थित दूतावासबाट प्रमाणीकरण गरिएको भनिएको नक्कली छापका कारण समस्या उत्पन्न भएको जनाइएको छ ।

मन्त्री खनालले उक्त विषयलाई संवेदनशील मान्दै मानवतावादी आधारमा पुनरावलोकन गर्न पोर्चुगल सरकारसँग औपचारिक आग्रह गरेका हुन् । 

जवाफमा मन्त्री रान्जेलले पोर्चुगलमा रहेको नेपाली समुदायको योगदानको प्रशंसा गर्दै सम्बन्धित निकायहरूसँग समन्वय गरी प्रभावित नेपालीहरूको मुद्दालाई सकारात्मक ढङ्गले समीक्षा गर्ने प्रतिबद्धता जनाए ।

उक्त संवादमा मन्त्री रान्जेलले खनाललाई हालै परराष्ट्र मन्त्रीको जिम्मेवारी सम्हालेकोमा बधाई दिँदै सफल कार्यकालको शुभकामना समेत व्यक्त गरे ।

यसैबिच, दुवै देशका मन्त्रीहरूले नेपाल–पोर्चुगल सम्बन्ध सुदृढ र सकारात्मक दिशामा अघि बढिरहेकोमा सन्तोष व्यक्त गरेका छन् । उनीहरूले जलविद्युत्, कृषि, पर्यटन, पूर्वाधार विकास तथा सूचना प्रविधि जस्ता क्षेत्रहरूमा द्विपक्षीय सहकार्य विस्तार गर्ने विषयमा समेत प्रतिबद्धता दोहोर्‍याएका छन् ।

यो संवादले विदेशमा रहेका नेपालीको समस्या समाधानतर्फ कूटनीतिक सक्रियता बढाएको छ ।